Þetta segir Guðjón Arngrímsson, upplýsingafulltrúi Icelandair, vegna ásakana í bréfi til Morgunblaðsins, sem birtist í gær, um að Icelandair steli eftirstöðvum af gjafabréfum.

„Almenn gjafabréf eru föst upphæð og þau er hægt að nota eins og manni sýnist. Það er hægt að nota til dæmis 10 þúsund krónur af slíku bréfi og geyma afganginn. Þau eru bara peningaleg inneign. Með verðlaunagjafabréfum erum við að leggja fram vöru, sem er bara flugsæti fram og til baka, en ekki fjármuni,“ segir Guðjón.

Þegar aðgangsorð á verðlaunagjafabréfi er slegið inn á síðu Icelandair kemur upp ákveðin upphæð, að sögn Guðjóns.

„Hún er höfð nógu há til þess að viðkomandi geti fengið flug á almennu farrými nánast hvaða dag sem er. Þótt verð á flugi á þeim degi sem valinn er sé lægra en upphæðin sem kom upp þegar aðgangsorðið var slegið inn þýðir það ekki að viðkomandi eigi mismuninn.“

Flugvallarskattar og aðrar greiðslur eru ekki innifaldar í verðlaunagjafabréfinu og kemur það fram í skilmálum á sjálfu bréfinu, að því er Guðjón greinir frá.

Handhafi gjafabréfsins getur ekki notað verðmismuninn til þess að greiða þessi gjöld þar sem hann á ekki mismuninn.

Hægt er þó að nýta alla upphæðina sem gefin er upp til þess að uppfæra sig í sæti en þá þarf að bæta við því sem upp á vantar. Það er þó ekki hægt að gera eftir að kaupin eru frágengin og farseðillinn gefinn út, að sögn Guðjóns.