Bankarnir fara í hart við Exista
mbl.is
Eftir Þorbjörn Þórðarson thorbjorn@mbl.is
Skilanefnd Landsbankans er í ólíkri stöðu og Kaupþing og Glitnir, því Exista á ekki gagnkröfur á bankann í formi gjaldmiðlaskiptasamnings. Uppgjör gjaldmiðlaskiptasamninga er mikið hagsmunamál fyrir núverandi eigendur Exista, en félagið telur sig eiga samtals 1,3 milljarða evra (233 milljarða króna) kröfur á hendur Kaupþingi og Glitni vegna samninganna. Við uppgjör þeirra vill félagið byggja á skráðu gengi Evrópska seðlabankans, en ekki gengisskráningu Seðlabanka Íslands.
Vilja skera niður kostnað
Samkvæmt heimildum Morgunblaðsins vilja skilanefndirnar gera breytingar á Exista og skera niður rekstrarkostnað, þ.ám. launakostnað, sem þykir heldur hár hjá félaginu. Einnig telja þær að endurskipulagningartillögur núverandi eigenda félagsins séu ekki raunhæfar.Samkvæmt gögnum, sem Morgunblaðið hefur undir höndum, hafa stjórnendur Exista lagt til að kröfuhafar félagsins taki veð í öllum eignum þess „að því marki sem mögulegt er“ og hafin verði arðgreiðsla úr dótturfélögum til móðurfélagsins, þ.e. Exista, til hagsbóta fyrir kröfuhafa. Ráðinn verði sérstakur ráðgjafi „Chief Restructuring Officer,“ sem hafi með höndum umsjón með fjárhagslegri endurskipulagningu.
Dótturfélög Exista eru Skipti, móðurfélag Símans, tryggingafélögin VÍS og Lífís og eignaleigufyrirtækið Lýsing. Það er því ljóst að mikil undirliggjandi verðmæti eru í félaginu, þrátt fyrir gríðarlega skuldsetningu.
Í hnotskurn
» Nýja Kaupþing og gömlu bankarnir eru helstu innlendu kröfuhafar Exista, en þeir vilja taka félagið yfir og víkja stjórnendum þess frá.» Erlendir kröfuhafar Exista eru 37 alþjóðlegir bankar, þ.ám. RBS, Deutsche Bank og Barclays.
» Sumir þeirra vilja ekki fara þessa leið þar sem þeir telja að hagsmunum sínum sé betur borgið með gömlu stjórnendurna við stjórnvölinn.
