„Við gerðum okkur klár í að vera með matvæli fyrir 300 fjölskyldur og það voru um 230 sem báðu um aðstoð. Þetta gekk bara ljómandi vel,“ segir Ásgerður Jóna Flosadóttir, formaður Fjölskylduhjálpar Íslands, um eftirspurnina þegar opnað var fyrir matargjafir eftir hlé í gær.

„Fólk áttar sig stundum seint á því hvenær hjálparstofnanir opna. Við erum með matvæli fyrir fjölskyldur til tveggja, þriggja daga,“ segir Ásgerður, sem vill sjá súpueldhús sett á legg í hjarta Reykjavíkur.

Anna Kristjánsdóttir, ritari Mæðrastyrksnefndar, kveðst hafa átt von á meiri þörf fyrsta daginn.

„Eftirspurnin var minni en við áttum von á en mikil engu að síður. Það komu um 300 manns til okkar en við áttum alveg von á 500 manns. Þegar við hættum í vor komu alltaf á fimmta hundrað, þannig að þetta er minna en við bjuggumst við.“

Anna býst við frekari eftirspurn á næstu dögum enda aukist hún jafnan eftir því sem líður á mánuðinn. Hún segir nefndina kvíða haustinu.