Borghildur Guðmundsdóttir

Eftir öllu að dæma virðist sem fyrir Borghildi Guðmundsdóttur, sem dæmd var til að fara á sunnudag með syni sína til Bandaríkjanna, sé ekkert annað í stöðunni en stíga upp í flugvél og takast á við forræðismál við föður drengjanna þar.

Kristrún Kristinsdóttir, skrifstofustjóri í dóms- og kirkjumálaráðuneytinu, segist ekki sjá að hægt sé að fá brottfor frestað. Hæstiréttur hafi staðfest úrskurð héraðsdóms og þar með dagsetningu brottfarar. Hún segir dómum sem þessum ætlað að leiðrétta ólögmætt ástand, niðurstaðan er að börnin eigi ekki að vera hér og ekki eigi að reka málið hér. Því sé reynt að flýta því að koma ólögmætu fyrirkomulagi hvað börnin varðar í lögmætt horf.

Kristrún segir ráðuneytið, í þessu máli sem og sambærilegum málum, hafa beðið um upplýsingar um hvort réttaraðstoð sé möguleg, sem ekki hefur borist svar við, og einnig hvort búast megi við handtöku. Svo virðist ekki vera þar sem engin kæra um barnsrán hafi verið lögð fram og því ekki verið gefin út nein handtökuskipun.

Fram hefur komið í viðtölum við Borghildi að hún hefur af því áhyggjur að geta ekki framfleytt sér og börnunum í Bandaríkjunum þar sem ekki sé hlaupið að því að fá atvinnuleyfi þar. Hjá bandaríska sendiráðinu fengust þær upplýsingar að það væri ekki sjálfgefið að fá atvinnuleyfi þótt börnin væru með bandarískt ríkisfang. Hins vegar sé ekki loku fyrir það skotið að fá atvinnuleyfi sem atvinnurekandi sæki um. Þá eigi Borghildur ekki rétt á gjafsókn þar sem hún er erlendur ríkisborgari. Hins vegar séu margir lögfræðingar þar sem starfi ókeypis fyrir fólk sem ekki hafi ráð á að borga lögfræðiþjónustu.