Frá Norðurbrú eftir að til átaka kom vegna svokallaðs Ungdomshus. AP

Íraskur maður, sem komst undan á flótta er danska lögreglan réðst til aðgerða gegn flóttamönnum og ólöglegum innflytjendum á Norðurbrú í Danmörku í nótt, á fjögurra ára son á Íslandi og hefur lýst vilja til að komast til Íslands við íslenska kunningja sína í Danmörku. 

Maðurinn, sem heitir Ali Nayef, hefur dvalið í Danmörku í nokkur ár sem skráður flóttamaður og talar dönsku. Sonur hans og fyrrum sambýliskona munu búa á Íslandi. 

Ekki hefur náðst í Mayef í síma í morgun en kunningi hans, sem blaðamaður mbl.is ræddi við, segir hann hafa verið í hópi manna sem hafðist við í kirkjunni. Hann hafi hins vegar komist undan á flótta og sé nú í felum í Kaupmannahöfn.

Sautján karlar, sem flestir eru sagðir vera frá Írak, voru handteknir er lögregla í Kaupmannahöfn gerði í nótt áhlaup á Brorson kirkjuna þar sem mennirnir hafa dvalið.

Flemming Munch, talsmaður Kaupmannahafnarlögreglunnar, segir að um 300 ungmenni hefi reynt að hindra störf lögreglu á staðnum. Til átaka hafi komið og fimm úr hópi ungmennanna einnig verið handteknir.

Konur og börn voru einnig í kirkjunni en þau voru ekki handtekin.