„Það eru svo margar spurningar sem vakna; viljum við til dæmis að elsta hús Reykjavíkur hverfi milli hárra bygginga í miðborginni? Viljum við að það verði stöðug rúturöð fyrir framan Alþingishúsið?“ segir Halla Bogadóttir, framkvæmdastjóri Kraums, um tillögu þess efnis að rífa Nasa-salinn við Vallarstræti og reisa þar fimm hæða hótel. Kraum er til húsa í Aðalstræti 10.

Frestur til að skila inn athugasemdum við tillöguna til skipulags- og byggingarsviðs Reykjavíkurborgar rennur út í dag og um hádegisbilið í gær höfðu sex athugasemdir borist og von var á fleirum.

Halla segir borgarfulltrúa hafa lofað að fresturinn verði lengdur. Í tillögunni sem nú er í kynningu kemur fram að flytja eigi tvö gömul hús, Vallarstræti 4 og Aðalstræti 7, inn á Ingólfstorg. „Sem borgarbúa þætti mér nær að borgaryfirvöld hugsuðu um torgið og skipulegðu það út frá þörfum borgarbúa í stað þess að heimila lóðareiganda að skipuleggja það eftir eigin höfði. Sem rekstraraðili mun ég flytja minn rekstur verði tillagan að veruleika. Þessum framkvæmdum mun fylgja mikið umrót í mörg ár og það lifir engin verslun hér eða mannlíf á meðan.“ Halla segir marga ferðamenn spyrja sig hvort gömlum húsum sé engin virðing sýnd í Reykjavík.