Eftir Ágúst Inga Jónsson aij@mbl.is

„Makríll hefur gengið miklu ákveðnar á norður- og vestursvæðið en ég hef séð á liðnum árum og mér virðist meira vera af makrílnum en áður,“ segir Sveinn Sveinbjörnsson fiskifræðingur, en hann er leiðangursstjóri í makrílleiðangri á Árna Friðrikssyni.

Sveinn segir ekki tímabært að áætla magnið, en niðurstöður leiðangursins verða meðal annars ræddar á sameiginlegum fundi íslenskra, norskra og færeyskra sérfræðinga í haust.

Árni Friðriksson var í gær staddur 160 mílur austnorðaustur af Langanesi, en leiðangri skipsins lýkur á morgun. Skipið hóf makrílrannsóknir út af Vesturlandi, síðan var farið austur með Suðurlandi yfir á Færeyjahrygginn og þá norður með Austfjörðum.

„Til að einfalda þetta má eiginlega segja að víðast á þessu svæði hafi makríll og síld verið í flestum togum. Ef við höfum ekki fengið norsk-íslenska síld eins og hér á norðaustursvæðinu höfum við fengið íslenska sumargotssíld,“ segir Sveinn.

Hann skýrir þessar auknu göngur makríls inn á svæðið með hlýnun sjávar og öðrum breytingum á umhverfisþáttum. Þá sé makrílstofninn sterkur og líklega vaxandi. Norðmenn gerðu mælingar á makríl í Noregshafi og Austurdjúpi og sýna þær sömuleiðis aukna útbreiðslu makríls á svæðinu.