Enn eru hátt í þúsund manns 18 ára og eldri, sem sótt hafa um framhaldsskólavist frá og með haustinu, sem ekki hafa fengið inni í neinum framhaldsskóla. Fæstir úr þessum hópi munu fá skólavist í dagskóla fyrr en hugsanlega um áramótin, en innan menntamálaráðuneytisins stendur til að skoða hvaða önnur menntunarúrræði standi þessum hópi til boða strax í haust.

„Þetta er aðeins lítilleg fjölgun frá fyrri árum, þannig að það er ekki beinlínis hægt að rekja þetta til ástandsins núna að þessi hópur fái ekki skólavist,“ segir Katrín Jakobsdóttir menntamálaráðherra. Tekur hún fram að hins vegar séu mun meiri líkur en áður á því að þessi hópur fái heldur ekki vinnu vegna efnahagsástandsins.

Sökum þessa hyggjast menntamálaráðherra og félagsmálaráðherra skipa starfshóp sem hafi það hlutverk að fara yfir þau menntunarúrræði sem standi yngra atvinnulausu fólki til boða, þ.e. fólki yngra en 25 ára. Nefnir hún í því samhengi kvöldskóla, fjarnám, Mími og aðrar símenntunarstöðvar þar sem hægt sé að safna einingum á framhaldsskólastigi. „Við þurfum þannig að greina þarfir þessa hóps, því hann er alls ekki einsleitur,“ segir Katrín.

Taka þarf tölum með fyrirvara

„Það verður að taka þessum tölum með fyrirvara, því reynslan sýnir okkur að það eru ekki allir sem skrá sig sem hafa raunverulegan áhuga á námi,“ segir Ólöf Helga Þór, náms- og starfsráðgjafi hjá Fjölbrautaskólanum í Breiðholti. Segir hún námsráðgjafa FB benda fólki eldra en 18 ára, sem sækist eftir dagskólavist en fær ekki, að fara í kvöldskóla því standi fólk sig vel þar séu góðar líkur til þess að það geti komist inn í dagskóla um áramótin.

Ólöf segir það heilmikið átak að henda sér aftur í fullt nám eftir nokkurra ára hlé og sitja á skólabekk með sér mun yngra fólki og því henti það mörgum betur að byrja rólega í kvöldskóla og taka tvö fög. Að sögn Ólafar hefur orðið nokkur breyting á bakgrunni nemenda í kvöldskóla FB eftir hrunið. „Við sjáum mörg dæmi þess að fólk sem tók kvöldskóla með vinnu hafi hætt því af ótta við að missa vinnuna. Þeir sem koma nýir inn í kvöldskóla eru í mörgum tilfellum fólk sem hefur misst vinnuna og vill nýta tímann meðan það er atvinnulaust,“ segir Ólöf.

Hún segir mikilvægt að fólk eldra en 18 ára sem hefur áhuga á framhaldsskólanámi leiti sér upplýsinga og ráðlegginga hjá náms- og starfsráðgjöfum ýmist hjá símenntunarstöðvum, framhaldsskólunum eða vinnumiðlunum því það sé svo ótal margt hægt að gera.

Undir þetta tekur Sigríður Birna Bragadóttir, náms- og starfsráðgjafi hjá Menntaskólanum við Hamrahlíð. „Það eru alltaf einhver úrræði. Fólk verður bara að vera duglegt að leita lausna, vera opið fyrir nýjum leiðum og gefast ekki upp,“ segir Sigríður. Tekur hún fram að í MH sé umsækjendum bent á að sækja kvöldskóla komist þeir ekki inn í dagskóla og sækja svo aftur um um áramótin.