Lögreglan rannsakar enn mannslát í Hafnarfirði í gær. mbl.is/Jakob

Enn er unnið að rannsókn á mannsláti í Hafnarfirðinum á mánudagskvöldið. Maður um þrítugt sem grunaður er um verknaðinn var úrskurðaður í gæsluvarðhald til 1. september í gær. Friðrik Smári Björgvinsson, yfirlögregluþjónn, segir að ekki verði gefið upp að svo stöddu hvort viðkomandi hafi játað á sig verknaðinn. Ekki sé gefið upp hvað hafi komið fram við yfirheyrslur yfir manninum en ekki var hægt að yfirheyra manninn fyrr en eftir hádegi vegna annarlegs ástands hans.

Friðrik Smári staðfestir að mennirnir tveir hafi þekkts og sá látni hafi verið gestkomandi hjá þeim sem grunaður er.

Að sögn lögreglunnar var hinn látni með áverka á höfði sem taldir eru hafa dregið hann til dauða, en lögreglan vill að svo stöddu ekki gefa upp hvað hafi verið notað sem morðvopn. Maðurinn sem er í haldi er grunaður um verknaðinn en hann hefur áður komið við sögu hjá lögreglu, m.a. vegna ofbeldis- og fíkniefnabrota.

Samkvæmt upplýsingum frá lögreglunni var maðurinn blóðugur og í annarlegu ástandi þegar hann var handtekinn.