mbl.is/Júlíus

„Það var sameiginleg niðurstaða aðila að vísa málinu til ríkissáttasemjara. Það er gott fyrir báða aðila að fá hlutlausan aðila til að stýra viðræðum, okkur finnst það vænlegri leið til að ná niðurstöðu. Fyrsti formlegi fundur undir stjórn sáttasemjara verður þriðjudaginn 1. september,“ segir Steinar Adolfsson, framkvæmdastjóri Landssambands lögreglumanna, LL.

Lögreglumenn kolfelldu nýgerðan kjarasamning við ríkið í liðinni viku. Já sögðu 31 eða 7,51%, nei sögðu 374 eða 90,56% og 8 skiluðu auðu eða 1,94%.

Framkvæmdastjóri LL segir að kröfugerð lögreglumanna liggi fyrir og hafi gert um langa hríð.

Helsti ásteytingarsteinninn er greiðsla sem bætt var ofan á laun lögreglumanna í október 2007 vegna aukins álags í starfi. Í kjaraviðræðum 2008 var helmingur 30 þúsund króna álagsgreiðslunnar færður inn í kjarasamning en hinn helmingurinn, 15 þúsund krónur, var ennþá greiddur samkvæmt samkomulagi. Þegar kjaraviðræður voru um það bil að hefjast fyrr á þessu áru var lögreglumönnum tilkynnt að sá helmingur álagsgreiðslunnar sem ekki hafði ratað inn í kjarasamninga í fyrra, yrði skorinn af.

„Þetta er augljóslega eitt þeirra stóru atriða sem skiptu máli varðandi þessa afdráttarlausu afstöðu lögreglumanna. Í aðdraganda kjaraviðræðna er lögreglumönnum tilkynnt um þessa 15 þúsund króna kjaraskerðingu, ofan á allt annað sem lögreglumenn, líkt og allir hjá hinu opinbera hafa þurft að taka á sig. Og það er fyrirséð að frekari skerðingar eru boðaðar hjá lögreglumönnum líkt og öðrum,“ segir Steinar Adolfsson, framkvæmdastjóri LL.

Steinar segir lögreglumenn gera sér grein fyrir því að ríkið hafi ekki mikið svigrúm til að gera betur við eina stétt en aðra við þær aðstæður sem nú eru.

„En það er sameiginlegt verkefni okkar og ríkisins að finna lausn sem líklegt er að lögreglumenn sættist á. Ekki viljum við á næstu mánuðum fara inn í meiri ólgu í þjóðfélaginu með ólgu innan lögreglunnar,“ segir Steinar.