Sorpbrennslustöðin Funi. Úrgangur, aska og óbrennanlegt sorp frá sorpbrennslunni Funa á Ísafirði er urðað við Klofning í Önundarfirði. Mynd bb.is

Stækkun urðunarstaðarins við Klofning í Önundarfirði þarf ekki að fara í umhverfismat, samkvæmt ákvörðun Skipulagsstofnunar.

Ísafjarðarbær er landeigandi og framkvæmdaraðili. Urðunarstaðurinn er á flötum hjalla, í um 35 metra hæð yfir sjó, um 1,5 kílómetra utan við íbúðabyggðina á Flateyri. Urðunarsvæðinu var skipt upp í fjóra reiti sem fyrirhugað er að nýta í jafn mörgum áföngum. Urðunarsvæði fyrsta áfanga, um 10.000 m², er að verða fullnýtt en urðun hófst þar 1993. Svæði annars áfanga, sem nú á að taka í notkun er um 8.400 m² að stærð. Fyrir neðan urðunarstaðinn er hár stallur niður í fjöruna.

Rekstur urðunarstaðarins byggir á því að urða úrgang, ösku og óbrennanlegt sorp frá sorpbrennslunni Funa á Ísafirði. Aska er og verður flutt í lokuðum gámum og óbrennanlegt sorp í sérstökum gámum frá Funa og öðrum gámasvæðum sveitarfélagsins, á sérútbúnum bifreiðum. Gert er ráð fyrir að í náinni framtíð verði byggð flokkunarstöð við Funa og með því móti verði hægt að lágmarka úrgang sem fari til urðunar.

Gert er ráð fyrir að urðun verði tæplega 500 tonn á ári og minnki um 25% eftir að flokkunarstöð er komin í gagnið og verði þá um 370 tonn á ári. Urðun mun fara fram vikulega.

Frágangur að urðun lokinni verður þannig að svæðið falli sem best að umhverfinu. Ekki er áformuð nein nýting á svæðinu að urðun lokinni, þó má gera ráð fyrir að svæðið verði nýtt að einhverju leyti til útivistar. Urðunarstaðurinn er á snjóflóðahættusvæði og því ekki gert ráð fyrir byggingum á svæðinu.

Áætlað er að annar áfangi urðunarstaðarins dugi í 13 ár, frá lokum ársins 2009 eða byrjun árs 2010.

Skipulagsstofnun telur að stækkun urðunarstaðarins við Klofning í
Önundarfirði, sé ekki líkleg til að hafa í för með sér umtalsverð
umhverfisáhrif og skuli því ekki háð mati á umhverfisáhrifum. Ákvörðun Skipulagsstofnunar má kæra til umhverfisráðherra og er kærufrestur til 21. september.

Vefur Skipulagsstofnunar