Stækkun friðlands í Þjórsárverum ljúki á næsta ári
mbl.is/RAX
Undirbúningur að stækkun friðlandsins í Þjórsárverum hefst nú þegar samkvæmt tillögu Svandísar Svavarsdóttur umhverfisráðherra sem var samþykkt á fundi ríkisstjórnarinnar í morgun. Umhverfisráðherra vill ljúka stækkun friðlandsins eigi síðar en snemma árs 2010.
Þetta kemur fram í tilkynningu frá umhverfisráðuneytinu. Þar kemur fram að í samstarfsyfirlýsingu ríkisstjórnarinnar segi að friðlandið í Þjórsárverum verði stækkað og friðun þess lokið hið fyrsta.
Stækkunin verði unnin í samræmi við ákvæði náttúruverndarlaga og undirbúningurinn verði í höndum Umhverfisstofnunar í samráði við landeigendur, viðkomandi sveitarfélög og aðra þá sem hagsmuni eiga að gæta.
Aðgerðir til að efla sjálfbærar samgöngur
Þá samþykkti ríkisstjórnin á fundi í morgun að hefja gerð áætlunar um sjálfbærar samgöngur með það að markmiði að draga úr þörf fyrir einkabílinn. Áætluninn verður unnin á vegum Svandísar Svavarsdóttur umhverfisráðherra og Kristjáns Möller samgönguráðherra en auk þess verður haft náið samstarf við fulltrúa fjármálaráðherra vegna breytinga sem lúta t.d. að skatta- og gjaldamálum.
Umhverfisráðherra og samgönguráðherra eru sammála um eftirfarandi aðgerðir sem lúta að almenningssamgöngum, hjólreiðum og öðrum aðgerðum til að draga úr losun gróðurhúsalofttegunda:
- Að auðvelda uppbyggingu hraðvagnakerfis með því að stuðla að aukinni forgangsröðun almannavagna í umferð auk þess sem hugað verði að því að hvetja almenning til að nota almenningssamgöngur.
- Að hvetja stofnanir og fyrirtæki til að taka upp heildstæða samgöngustefnu. Þannig verði opinber fyrirtæki og stofnanir hvött til að niðurgreiða fargjöld í strætó fyrir starfsmenn sína til að draga úr notkun einkabíls. Einnig verði skoðuð möguleg aðkoma ríkisins að verkefninu ókeypis í strætó.
- Að styðja við hjólreiðar almennings með því að leggja til breytingar á vörugjöldum á innflutningi á reiðhjólum og vara- og fylgihlutum fyrir þau.
- Að breyta reglum sem hvetja olíufélög til að blanda bensín með lífetanóli og dísilolíu með lífdísilolíu og takmarka innflutning ökutækja sem losa mikið magn gróðurhúsalofttegunda, takmarka innflutning á bílum sem ekki geta gengið fyrir íblönduðu eldsneyti.
- Að vinna með fjármálaráðuneyti að því að hraða breytingum á skattlagningu ökutækja og eldsneyti sem taki mið af umhverfissjónarmiðum.
- Að auka áróður og fræðslu um umhverfisáhrif og kostnað mismunandi samgöngukosta.
