Mynd shs.is

„Það gekk ekkert. Viðmið vegna launahækkana og starfslokaaldur eru m.a. þau atriði sem okkur greinir á um,“ segir Valdimar Leó Friðriksson, framkvæmdastjóri Landssambands slökkviliðs- og sjúkraflutningamanna, LSS eftir fund með Launanefnd sveitarfélaga í dag.

Félagsmenn í LSS kolfelldu nýgerða kjarasamninga við ríkið og Launanefnd sveitarfélaga á dögunum. Samningur slökkviliðsmanna við sveitarfélög var felldur með 85% greiddra atkvæða. 13% sögðu já. Svipuð niðurstaða varð í kosningu um samning við ríkið vegna sjúkraflutningamanna. 85% sögðu nei en 14% já.

Í kjölfarið var deilunni vísað til ríkissáttasemjara og hittust samninganefndir á fyrsta fundi í dag. Lítið þokaðist áfram. Meðal þess sem tekist er á um, eru taxtahækkanir sem samið var um á almennum markaði í tengslum við stöðugleikasáttmálann. Launanefnd sveitarfélaga vill miða við þann launaflokk sem slökkviliðsmenn eru í, eftir að búið er að bæta við launaflokkum vegna námskeiða og annarra réttinda. LSS vil miða við grunnröðun í launaflokka, líkt og á almennum vinnumarkaði. Að öðrum kosti fái félagsmenn LSS ekkert út úr samningnum. Þá er einnig tekist á um starfslokaaldur. Slökkviliðs- og sjúkraflutningamenn fara á eftirlaun 67 ára en LSS hefur sett fram kröfu um að starfslokaaldur verði færður niður í 60 ár.

„Þessi fyrsti fundur gefur ekki tilefni til bjartsýni en við ákváðum að hittast á ný 31. ágúst,“ segir framkvæmdastjóri LSS.

Samninganefnd LSS hitti í vikunni samninganefnd ríkisins vegna kjarasamninga sjúkraflutningamanna. Annar fundur hefur ekki verið boðaður með ríkinu en samningar slökkviliðs- og sjúkraflutningamanna hafa haldist í hendur.

Þá þingaði samninganefnd LSS líka í dag með Samtökum atvinnulífsins vegna slökkviliðsmanna sem starfa hjá Keflavíkurflugvelli ohf. Um 50 slökkviliðsmenn starfa á vellinum og rennur gildandi kjarasamningur út 31. ágúst nk. Framkvæmdastjóri LSS segist ágætlega bjartsýnn eftir þennan fyrsta fund í dag vegna slökkviliðsmanna á Keflavíkurflugvelli en nýr samningafundur er boðaður 4. september.