Lokahnykkur söfunarátaksins Á allra vörum verður á föstudagskvöldið eftir viku en þá verður söfnunarþáttur í beinni útsendingu á SkjáEinum. Söfnunarátakið hófst á síðasta ári og hefur haldið áfram á þessu ári með sölu á  varaglossum frá Dior.

Söfnunarþátturinn hefst á SkjáEinum klukkan 21 og verður „skemmtiþáttur með tilgangi", þar sem landsþekktar konur og karlar leggja málefninu lið á margvíslegan hátt og allir gefa vinnu sína til styrktar hvíldarheimili krabbameinssjúkra barna.

Meðal þeirra sem að útsendingunni koma eru Jóhanna Vilhjálmsdóttir, Svanhildur Hólm og Guðrún Þórðardóttir en þær stýra þættinum og þar með söfnuninni. Börn og unglingar úr söng- og leiklistarskólanum Sönglist styðja við bakið á jafnöldrum sínum en þar á meðal er hin íslenska söngrödd Sollu stirðu. Hljómsveitin Mannakorn með þá Magnús Eiríksson og Pálma Gunnarsson í broddi fylkingar flytur nokkur lög, en Mannakorn hefur einmitt gefið allan ágóða af laginu Von í söfnunina fyrir hvíldarheimilið. Stöllurnar úr Fúlar á móti segja sitt álit á lífinu og tilverunni.

Auk þessa kynnast áhorfendur því hvernig fjölskyldur sem kljást við þennan illvíga sjúkdóm læra að lifa með og takast á við krabbamein og hvers vegna hvíldarheimili er svo þýðingarmikið fyrir börnin og fjölskyldur þeirra.　Bein útsending er frá sjónvarpssal SkjásEins og þjónustuveri Já – 118 þar sem landsþekktir einstaklingar svara í sérstakt áheitanúmer, en símanúmer sem tengjast ákveðnum upphæðum verða opnuð fáeinum dögum fyrir útsendinguna. Einnig verður útsendingin send út á vef Morgunblaðsins; www.mbl.is.

Útsendingin „Á allra vörum" er sameiginlegt átak forsvarskvenna átaksins „Á allra vörum", Styrktarfélags krabbameinssjúkra barna og SkjásEins. Allir þeir sem koma að útsendingu þáttarins gefa vinnu sína líkt og á síðasta ári.

Hægt er að leggja sitt af mörkum með því að hringja í áheitanúmerin eða með því að leggja inn á reikning „Á allra vörum". Reikningsnúmerið er 0101-26-55555 og kennitala 510608-1350.