Meirihluti fjárlaganefndar Alþingi segir í nýju nefndaráliti um Icesave-frumvarpið svonefnda, að afgreiðsla Icesave-lánasamninganna á Alþingi hafi engin áhrif á þann rétt slitastjórnar og skilanefndar að láta reyna á skaðabótaskyldu vegna bresku hryðjuverkalagananna.

Tveir lögmenn skrifuðu grein í Morgunblaðið í vikunni þar sem þeir bentu á möguleika á að nýta hugsanlegan rétt til skuldajöfnunar í Icesave-málinu.
Fjárlaganefnd fjallaði um þetta og segir í nefndaráltitinu, að fram hafi komið sú gagnrýni að með Icesave-samningunum væri íslenska ríkið að afsala sér mögulegum bótarétti, sem til hefði stofnast þegar bresk yfirvöld nýttu heimildir í hryðjuverkalögum og kyrrsettu íslenskar eignir þar í landi.

Á móti hafi veirð bent á, að íslensk yfirvöld hefðu fengið mat sérfræðinga á réttarstöðu sinni í kjölfar hinna harkalegu aðgerða Breta þar sem dregið hefði verið í efa að íslenska ríkið gæti höfðað mál til viðurkenningar á bótarétti sínum. Íslenska ríkið hefði hins vegar áskilið sér rétt til að styðja við málshöfðanir íslenskra lögaðila, þ.e. Landsbanka Íslands og Kaupþings.

„Það er álit meiri hlutans að skilanefnd og slitastjórn Landsbanka Íslands hf. séu þeir aðilar sem ættu að láta reyna á skaðabótaskyldu vegna hryðjuverkalaganna fremur en íslenska ríkið og hefur afgreiðsla Icesave-lánasamninganna engin áhrif á þann rétt slitastjórnar og skilanefndar," segir í nefndarálitinu. 

Nefndarálitið í heild