Árvakur/Ásdís

Neytendastofa hefur lagt 600.000 króna stjórnvaldssekt á ferðaskrifstofuna Heimsferðir fyrir að fara ekki að tilmælum stofnunarinnar um að gefa upp endanlegt  verð á ferðum sem bókaðar eru á netinu.

Að sögn Neytendastofu er bókunarferlinu skipt upp í nokkur þrep á bókunarvef Heimsferða. Á fyrsta þrepi er valin áfangastaður og fjöldi farþega. Á öðru þrepi eru valdar dagsetningar ferðarinnar bæði á leið út og bakaleið. Á þriðja þrepi er valið hótel og kemur þar fram verð ferðar undir yfirskriftinni „verð frá“.

Þegar hótel hefur verið valið er farið á fjórða þrep þar sem fram kemur heildarverð ferðarinnar. Við það verð sem birtist á þriðja þrepi hefur í fjórða þrepi bæst flugvallaskattar og önnur gjöld og eftir atvikum hækkun á eldsneytisgjald, þ.e. eldsneytisálag. Þá geta neytendur á fjórða þrepi valið hvort þeir óski eftir að kaupa rútuferð til og frá flugvelli.

Neytendastofa segir, að á seljendum vöru og þjónustu hvíli afdráttarlaus skylda til að gefa upp endanlegt verð vöru sinna eða þjónustu. Því sé það mat stofnunarinnar að sú framsetning Heimsferða að gefa upp „verð frá“ sem innihaldi ekki skatta og önnur gjöld sé brot gegn ákvæðum laga. Sé sú krafa um verðframsetningu í samræmi við þær kröfur sem stofnunin hafi gert til annarra ferðaskrifstofa og flugrekenda.

Í málinu beindi Neytendastofa ítrekað tilmælum til Heimsferða um að koma verðframsetningu í lögmætt horf. Að lokafresti liðnum höfðu breytingar ekki enn verið gerðar og því taldi Neytendastofa rétt að leggja á Heimsferðir stjórnvaldssekt að fjárhæð 600.000 krónur.