Atkvæðagreiðsla um Icesave-málið hófst klukkan 10 á Alþingi.

Lokaatkvæðagreiðsla um frumvarp um ríkisábyrgð vegna Icesave-lánasamninganna, hófst á Alþingi klukkan 10.  Fram kom við upphaf atkvæðagreiðslunnar að þingmenn Sjálfstæðisflokks myndu greiða atkvæði með breytingartillögum en þingmenn Framsóknarflokks sitja hjá.

Ögmundur Jónasson, heilbrigðisráðherra, sagði í upphafi atkvæðagreiðslunnar, að málið hefði verið erfitt þingi og þjóð og sundrað þingmönnum. Sagðist Ögmundur hafa lagt til að þingmenn tækju á málinu ekki sem stjórn og stjórnarandstaða heldur sem alþingismenn og fulltrúar þjóðarinnar. Þetta hefði tekist og breið samstaða myndast í þingsalnum

Hann sagðist hafa sannfærst um það innra með sér, að málið myndi aldrei falla á þingi því í stjórnarandstöðunni hefði verið að finna marga þingmenn, sem ætluðu ekki láta málið falla. Þá hafi verið hafist handa við að smíða fyrirvara sem myndu gagnast almannahag. Það tókst, sagði Ögmundur og einnig að opna augu Alþingis og ríkisstjórar, að viðhafa eigi gagnsæ vinnubrögð.

Breytingartillögur frá Framsóknarflokki við frumvarpið voru felldar með atkvæðum stjórnarliða gegn atkvæðum framsóknarmanna en aðrir þingmenn sátu hjá. Breytingartillögur meirihluta fjárlaganefndar voru hins vegar samþykktar með atkvæðum þingmanna Samfylkingar, VG, Sjálfstæðisflokks og Borgarahreyfingar. Þráinn Bertelsson greiddi atkvæði gegn tillögunum en þingmenn Framsóknarflokks sátu hjá.

Bein útsending frá Alþingi