Stjórninni ekki sætt verði fyrirvörum hafnað
Bjarni Benediktsson flutti ávarp á opnum fundi sjálfstæðismanna í dag. mbl.is/Árni Sæberg
„Verði fyrirvörunum við ríkisábyrgð á Icesave-samning ríkisstjórnarinnar hafnað, verði ekki fallist á skilaboðin frá Alþingi, er ég jafnframt þeirrar skoðunar að ríkisstjórnin eigi að segja af sér. Hún hefur þá endanlega sannað sig að vera óhæfa til að gæta að hagsmunum þjóðarinnar,“ sagði Bjarni Benediktsson, formaður Sjálfstæðisflokksins á opnum fundi í Valhöll í morgun.
Bjarni sagði að sjálfstæðismenn hefðu tekið ákvörðun um að starfa með nýjum meirihluta í Icesave-málinu. Hann hafi samanstaðið af stjórnarandstöðu og nokkrum úr andspyrnuhreyfingunni í Vinstri grænum. Ekki hafi komið til greina að veita ríkisábyrgð á Icesave-samning ríkisstjórnarinnar.
Afstaðan hafi kallað fram efasemdir hjá nokkrum sjálfstæðismönnum en hefðbundin leikur í stjórnarandstöðu að vera á móti hefði leitt til klofnings á þingi sem aðeins hefði varað í takmarkaðan tíma.
Andspyrnuhreyfingin og aðrir stjórnarliðar hefðu náð saman að lokum og það hefði leitt til miklu verri niðurstöðu á frumvarpi ríkisstjórnarinnar.
„Ég tel því að við höfum valið ábyrgu leiðina í málinu. Þá leið sem var til mestra heilla fyrir íslenska þjóð og ég mun alltaf velja þá leið. Sama hvernig stendur á,“ sagði Bjarni og uppskar mikið klapp fyrir.
Formaðurinn sagði að ef Hollendingar og Bretar höfnuðu fyrirvörunum og höfnuðu því að verða við kröfum Alþingis um sanngjarnt tillit til aðstæðna á Íslandi væri málið í uppnámi. Þá ættum við að lýsa því yfir að Íslendingar ættu ekki að sæta þvingunarskilmálum heldur fara fram á hlutlausa dómsmálameðferð.
„Við höfum ítrekað sagt að Íslendingar ætla að standa við skuldbindingar sínar,“ sagði Bjarni og bætti við: „Verði fyrirvörunum hafnað, verði ekki fallist á skilaboðin frá Alþingi, er ég jafnframt þeirrar skoðunar að ríkisstjórnin eigi að segja af sér. Hún hefur þá endanlega sannað sig að vera óhæfa til að gæta hagsmunum þjóðarinnar, sett samskipti okkar við aðrar þjóðir í fullkomið uppnám með því að lofa samningum sem hún gat ekki staðið við, auk þess að fara gegn vilja þingsins og gegn vilja þjóðarinnar. Slík ríkisstjórn verður einfaldlega að víkja.“
