Vaxandi samfélagsógn
Tímabundið landamæraeftirlit var tekið upp vegna veisluhalda vélahjólaklúbbsins Fáfnis. Talið var að sérstök ógn stafaði af sumum boðsgestum, en meðal þeirra voru norrænir Vítisenglar. mbl.is/Sverrir Vilhelmsson
Ríkislögreglustjóri segir starfsemi skipulagðra glæpasamtaka vaxandi samfélagsógn og telur að huga beri að lagabreytingum sem auðvelda lögreglu að bregðast við slíku. Sérstakur hópur ríkislögreglustjóra sem stýrt hefur baráttu yfirvalda gegn skipulagðri glæpastarfsemi fjallaði í morgun um tilraunir Hells Angels til að ná hér fótfestu. Skýrt var frá því í byrjun þessa árs að vélhjólaklúbburinn Fáfnir hefði öðlast viðurkenningu sem stuðningsaðili Vítisengla hér á landi.
Fréttir af viðurkenningu Vítisengla á Fáfni sem stuðningsklúbbi eru því ekki nýjar af nálinni og koma ekki á óvart. Ríkislögreglustjóri segir í tilkynningu að upplýsingarnar hafi þegar komið fram skýrslum ríkislögreglustjóra þar sem mat er lagt á skipulagða glæpastarfsemi hér á landi. Í opinni útgáfu af skýrslu greiningardeildar ríkislögreglustjóra sem birt var í febrúarmánuði segir m.a.:
„Íslenski vélhjólaklúbburinn Fafner MC-Iceland (Fáfnir) hefur hlotið viðurkenningu sem „stuðningsklúbbur“ Hells Angels hér á landi. Þar með hefur hópur manna á Íslandi stofnað til formlegra tengsla við alþjóðleg glæpasamtök. Fyrir liggur að félagar í Fafner MC-Iceland stefna að fullri aðild að Hells Angels-samtökunum.“
Þá segir að alls staðar þar sem Hells Angels hafi náð að skjóta rótum hafi aukin skipulögð glæpastarfsemi fylgt í kjölfarið. Spenna ríki í heimi skipulagðra glæpahópa vélhjólamanna á Norðurlöndum. Nýir hópar láta nú til sín taka og þar sé oft um að ræða svonefnda „stuðningsklúbba“ við þekkt glæpasamtök á borð við Hells Angels.
Ríkislögreglustjórar Norðurlandanna mótuðu þá skýru stefnu fyrir allnokkrum árum að berjast gegn skipulagðri glæpastarfsemi mótorhjólagengja. Embætti ríkislögreglustjóra á Norðurlöndum vinna í sameiningu að þessu markmiði sem mörgum öðrum.“
Þá segir ríkislögreglustjóri að staðfest sé að vélhjólklúbburinn Fáfnir muni að öllu óbreyttu geta sótt um fulla aðild að Hells Angels samtökunum á seinni hluta næsta árs.
Langtímamarkmið Fáfnismanna
Ríkislögreglustjóri segir að tilraunir Hells Angels til að ná fótfestu á Íslandi megi rekja ein sjö ár aftur í tímann, hið minnsta. Viðbrögð lögreglu og tollgæslu hafi jafnan verið á sama veg. Ítrekað hafi komið til þess að hópar erlendra liðsmanna Hells Angels hafi verið stöðvaðir við komu til landsins og þeim meinuð landganga. Yfirleitt hafi verið gripið til slíkra ráðstafana eftir að borist hafi upplýsingar um að í ráði séu veisluhöld á vegum Fafner MC-Iceland með þátttöku erlendra félaga í Hells Angels.
Þetta gerðist síðast í marsmánuði á þessu ári er ákveðið var að taka upp tímabundið landamæraeftirlit á innri landamærum Schengen-svæðisins í samræmi við 2. mgr. 2. gr. Schengen-samningsins eftir að aflað hafði verið upplýsinga um að fjölmargir erlendir félagar í Hells Angels hygðust sækja íslenska félaga sína heim.
Ríkislögreglustjóri segir að færa megi rök fyrir því að hörð viðbrögð lögreglu á síðustu árum við heimsóknum félaga í Hells Angels hingað til lands hafi reynst fallin til að tefja fyrir fullri aðild Fafner MC-Iceland að samtökunum. Við framkvæmd þessarar stefnu hafi góð samvinna við frændþjóðir á Norðurlöndum reynst sérlega mikilvæg.
Stýrihópur starfandi um árabil
Um árabil hefur verið starfræktur sérstakur stýrihópur sem stýrt hefur baráttu yfirvalda gegn skipulagðri glæpastarfsemi vélhjólagengja. Þetta gerir hópurinn m.a. með því að samhæfa krafta lögreglu og annarra yfirvalda. Stýrihópur ríkislögreglustjóra kom saman til fundar í dag og var þar farið yfir fyrirliggjandi upplýsingar um umsvif Hells Angels hér á landi. Ríkislögreglustjóri segir að lögregla og tollgæsla á Norðurlöndum hafi aukið samstarf sitt, m.a. varðandi skipulagða glæpastarfsemi en sameiginlegur fundur þessara aðila var haldinn á Íslandi í september í fyrra.
Vaxandi samfélagsógn
Ríkislögreglustjóri segir að í Danmörku og þá sérstaklega í Kaupmannahöfn hafi skálmöld ríkt á síðustu misserum vegna harðvítugra átaka innflytjendagengja og félaga í Hells Angels og stuðningsklúbbum þeirra. Í þeim átökum hefur skotvopnum m.a. verið beitt og hafa félagar í stuðningsklúbbum Hells Angels mjög látið til sín taka.
Í Noregi hefur félögum í samtökum vélhjólamanna sem tengjast skipulagðri glæpastarfsemi fjölgað mjög á undanliðnum árum. Sömu þróun má greina víðar í nágrannalöndum Íslendinga.
Þróunin á Íslandi hefur um margt líkst þeirri sem greina hefur mátt á Norðurlöndum á síðustu árum og vikið er að í opinni útgáfu skýrslu greiningardeildar frá því fyrr í ár.
„Á það ekki síst við um markvissa viðleitni til að koma upp kerfi stuðningsklúbba hér á landi. Á Norðurlöndum líta stjórnvöld á skipulögð glæpasamtök vélhjólamanna á borð við Hells Angels sem vaxandi samfélagsógn. Í Danmörku hafa stjórnvöld vakið máls á þeim möguleika að bann verði lagt við starfsemi vélhjólagengja á borð við Hells Angels. Í maímánuði í ár lýsti þáverandi dómsmálaráðherra Danmerkur yfir því að hann teldi slíkt bann vel koma til álita,“ segir í tilkynningu ríkislögreglustjóra.
Ríkislögreglustjóri segir að þróunin á Íslandi sem og í nágrannaríkjunum kalli á að aukinn þungi verði lagður í baráttu gegn þessari birtingarmynd skipulagðrar glæpastarfsemi.
„Mikilvægt er að samræmd viðbrögð hér á landi njóti víðtæks stuðnings í samfélaginu. Jafnframt liggur fyrir að nauðsynlegt er að tiltæk úrræði verði tekin til endurskoðunar. Í því efni telur ríkislögreglustjóri að huga beri að lagabreytingum til að auðvelda lögreglu að bregðast við þessari samfélagsógn,“ segir ríkislögreglustjóri.
