Golli / Kjartan Þorbjörnsson

Fimmti hver einstaklingur hefur þurft á sérstökum úrræðum að halda til að geta staðið skil á greiðslum vegna lána.  Þetta kemur fram í skoðanakönnun sem Capacent Gallup gerði fyrir ASÍ í júní. 

ASÍ segir, að ekki virðist skipta miklu hvaða tekjur menn hafa því jafn stórt hlutfall af tekjulægsta og tekjuhæsta hópnum hafi þurft á úrræðum að halda til að geta staðið í skilum.  

Af þeim sem telja sig í vandræðum með að standa í skilum hafa 70% sótt um eða nýtt sér þau úrræði sem er í boði en 30% hafa ekki gert það.  ASÍ segir greinilega fylgni er milli hækkandi menntunarstigs og þess að fólk leiti þeirra úrræða sem eru í boði. Þannig hafi 83% þeirra, sem séu með háskólapróf og telji sig þurfa sérstök úrræði. leitað eftir þeim en aðeins 32% þeirra sem bara eru með grunnskólapróf. 

Hins vegar segjast aðeins 37% þeirra, sem hafa nýtt sér þau úrræði við greiðsluvanda sem eru í boði, telja sig hafa fengið fullnægjandi úrlausn mála.  63% segja úrræðin ekki hafa dugað. 

Capacent Gallup gerði könnunina fyrir ASÍ í 26. maí og 16. júní 2009.  Um net- og símakönnun var að ræða.  Úrtakið var 1248 manns á landinu öllu, 18-75 ára.

Vefur ASÍ