mbl.is/Kristinn

Eftir Þorbjörn Þórðarson thorbjorn@mbl.is

Fjársterkir innlendir og erlendir fjárfestar hafa sýnt 51 prósents eignarhlut Teymis í Tali áhuga en Teymi var skyldað af Samkeppniseftirlitinu í júlí síðastliðnum til að selja „sem fyrst“ eignarhlut sinn í Tali vegna samkeppnisbrota. Ákvörðun eftirlitsins miðaði að því að tryggja samkeppnislegt sjálfstæði Tals. Söluferli á hlut Teymis í Tali hefur ekki hafist þrátt fyrir áhuga fjárfesta sem telja að Tal eigi mikla möguleika og að það sé í söluhæfu ástandi í dag.

Nýi Landsbankinn (NBI) fer nú með 82 prósenta eignarhlut í Tali eftir að hafa tekið yfir félagið Fjallaskarð (áður Capital Plaza ehf.) sem er í eigu Jóhanns Óla Guðmundssonar, en það félag fór með tæplega 32 prósenta hlut í Tali. Þá tekur bankinn formlega við 62,16 prósenta eignarhlut í Teymi í dag. Samkvæmt upplýsingum Morgunblaðsins verður eignarhlutur NBI í Tali færður undir Vestia, sérstakt eignarhaldsfélag bankans, og er stefnt að því að selja eignarhlutinn í Tali í einu lagi í lok þessa árs.

Ný stjórn Tals hefur verið skipuð, en í henni situr Sigurður G. Guðjónsson, hæstaréttarlögmaður, fyrir hönd NBI, en hann var lögmaður Teymis meðan deilur meðal eigenda Tals stóðu sem hæst fyrr á þessu ári. Samkvæmt heimildum blaðsins er það ætlun nýrra eigenda Teymis að Árni Pétur Jónsson verði áfram forstjóri félagsins, en hann var forstjóri Teymis þegar samkeppnisbrot sem beindust að Tali áttu sér stað.