Úr myndasafni.

Rúmlega þriðjungur þeirra kvenna sem gekkst undir fóstureyðingu á Íslandi í fyrra, hafði áður gengist undir fóstureyðingu. Tæpur fjórðungur kvennanna hafði gengist undir eina fóstureyðingu áður, tæp 7% undir tvær og rúm 3% undir þrjár.

Í fyrra voru skráðar 955 fóstureyðingar hjá konum með lögheimili á Íslandi, samkvæmt nýjum tölum landlæknisembættisins. Þetta er nokkru meira en árið 2007 en þá voru skráðar 905 fóstureyðingar hér á landi. Fjölgunin er rúm 5,5%.

Frá árinu 1982 hafa verið framkvæmdar samtals 21.064 fóstureyðingar hér á landi eða 780 að meðaltali á ári. Flestar aðgerðir voru framkvæmdar árið 2000 eða 987 en fæstar árið 1982 eða 613. Fóstureyðingar í fyrra voru jafnmargar og árið 2003 eða 955 hvort ár.

Tæplega 34% eða 324 af 955 konum sem gengust undir fóstureyðingu í fyrra, höfðu áður  farið í eina eða fleiri fóstureyðingar. Þetta er svipað hlutfall og síðustu tíu ár. Veruleg breyting hefur hins vegar orðið frá tíunda áratug síðustu aldar. Þá höfðu 11-24% kvenna sem gengust undir fóstureyðingu, áður farið í slíka aðgerð, eina eða fleiri.

Ástæður fóstureyðingar eru í 90-95% tilfella félagslegar en læknisfræðilegar ástæður koma til í 3-5% tilfella.

Tæplega tvöfalt fleiri konur, 40 ára og eldri gengust undir fóstureyðingu í fyrra en árið 2007. Í fyrra gengust 68 konur 40 ára og eldri undir fóstureyðingu eða rúm 7% þeirra sem gengust undir slíka aðgerð. Árið 2007 var hlutfall kvenna 40 ára og eldri sem gengust undir fóstureyðingu 3,4% en þá var fóstri eytt hjá 31 konu 40 ára og eldri.

Engin kona udnir 15 ára aldri gekkst undir fóstureyðingu í fyrra. Árið 2007 var fóstri eytt hjá 5 konum undir 15 ára aldri og 10 árið 2006.

Tölur um fóstureyðingar á vef landlæknis