Guðrún Magnea Árnadóttir nauðlenti lítilli einkaflugvél á túni við Vesturlandsveg á Kjalarnesi fyrir hádegi í gær. Hún var á flugi yfir Hvalfirði þegar vélin missti afl. Guðrún sagðist strax hafa áttað sig á því að hún næði ekki alla leið til Reykjavíkur og því ákveðið að nauðlenda.

Um tvær mínútur liðu frá því Guðrún skynjaði að ekki var allt með felldu, þar til hún var lent. „Ég varð vör við miklar gangtruflanir. Hreyfillinn gekk áfram en vélin missti afl og hraða og ég gerði mér grein fyrir því að ég næði ekki alla leið til Reykjavíkur. Sá svo þetta tún og það kom ekkert annað til greina en að lenda þar,“ sagði hún í samtali við Morgunblaðið í gær.

Lendingin gekk eins og í sögu og vélin, sem er af Beechcraft-gerð, er óskemmd. „Þetta er líklega það sem allir flugmenn óttast að muni einhvern tíma eiga sér stað, en þegar það gerðist var ég alveg ótrúlega róleg. Þetta var ekkert alvarlegt og nú er bara að drífa sig sem fyrst í loftið aftur.“

Guðrún Magnea, sem er 26 ára, hefur lokið bóklegu námi til atvinnuflugmannsréttinda og er að byrja á verklega hlutanum. Er að „safna tímum“ eins og hún orðar það. Hún fór frá Reykjavíkurflugvelli í gærmorgun upp í Borgarfjörð og var á heimleið þegar vélin bilaði.