Landsvirkjun áformar að byggja þrjár virkjanir í Neðri Þjórsá. Tvær þeirra, Hvamms- og Holtavirkjun, eiga að vera í Skeiða- og Gnúpverjahreppi. mbl.is/Rax

„Umræðan er villandi og fullyrðingar fyrrverandi sveitarstjóra beinlínis rangar,“ segir Gunnar Örn Marteinsson, oddviti Skeiða- og Gnúpverjahrepps. Hann segir illt að sitja undir ásökunum um mútuþægni. Greiðslur Landsvirkjunar vegna skipulagsvinnu sem tengist virkjunaráformum í Neðri Þjórsá séu eðlilegt endurgjald vegna aukinnar vinnu.

Landsvirkjun áformar að byggja þrjár virkjanir í Neðri Þjórsá. Tvær þeirra, Hvamms- og Holtavirkjun, eiga að vera í Skeiða- og Gnúpverjahreppi og þurfti að breyta deiliskipulagi vegna áformanna, sem sveitarstjórn Skeiða- og Gnúpverjahrepps hefur nú samþykkt.

Sigurður Jónsson, fyrrverandi oddviti hreppsins kom fram í gær og sagði sveitarstjórnarmenn hafa þegið greiðslur frá Landsvirkjun fyrir óbókaða fundi. Hver um sig hefði fengið 200 þúsund króna greiðslu frá LV fyrir að sitja tíu fundi. Þá hefði LV greitt hreppnum annan kostnað, samtals um ellefu milljónir króna, m.a. vegna lögfræðikostnaðar.

„Þegar svona lítið sveitarfélag er að ráðast í svona mikla skipulagsvinnu Þá þarf að standa vel að því. Menn verða að kosta ýmsu til, m.a. vegna lögfræðiaðstoðar og það er eðlilegt að sá sem óskar eftir breytingum, standi straum af kostnaðinum. Svo er rétt að halda því til haga að þessir fundir sem svo mikið er rætt um, voru ekki allir með Landsvirkjun,“ segir oddviti Skeiða- og Gnúpverjahrepps.

Hann segir illt að sitja undir ásökunum um mútuþægni í þessu sambandi.

„Það fer alltaf í gang ákveðið ferli þegar kemur að umræðum um virkjanir en ég held að óhætt sé að segja að gömul særindi vegna viðskilnaðar fyrrverandi sveitarstjóra, vegi þungt í umræðunni sem hér hefur verið sett af stað,“ segir oddviti Skeiða- og Gnúpverjahrepps.