Sigríður Margrét Oddsdóttir, framkvæmdastjóri Skjá miðla og Óskar Magnússon, útgefandi Morgunblaðsins

Forsvarsmenn SkjásEins og Morgunblaðsins undirrituðu í dag samstarfssamning sem felur í sér að SkjárEinn mun hefja útsendingar á fréttum í sjónvarpi sem unnar eru af Morgunblaðinu. Fréttirnar verða sýndar kl. 18:50 og endursýndar kl. 21:50 alla virka daga. Fyrsti fréttatíminn fer í loftið fyrir lok mánaðarins.
 
„Með þessum samstarfssamningi erum við að láta reyna á nýjar leiðir í íslensku sjónvarpi,“ segir Sigríður Margrét Oddsdóttir, framkvæmdastjóri Skjá miðla, í fréttatilkynningu.

„Ástæðan er tvíþætt. Annars vegar teljum við að það sé markaður fyrir fréttir frá Morgunblaðinu í sjónvarpi, þær dragi að sér áhorf og þar með auglýsingatekjur og hins vegar viljum við stuðla að frekari miðlun faglegra frétta í íslensku sjónvarpi.“ 
 
Samstarfssamningurinn er skilgreindur sem tilraunaverkefni og verður framhald samstarfsins metið í kjölfar mælinga á áhorfi og auglýsingatekjum.
 
„Morgunblaðið hefur yfirburði í öllum mælingum á trausti almennings til einkarekinna fjölmiðla,“ segir Óskar Magnússon, útgefandi Morgunblaðsins, í fréttatilkynningu.  „Við lítum á þetta samstarfsverkefni sem góða leið til þess að styrkja bæði félögin sem koma að þessum samningi.”
 
Undirbúningur fréttaútsendinga stendur nú yfir og er unnið að ráðningu fréttaþuls.

Morgunblaðshúsið í Hádegismóum. mbl.is/ÞÖK