Lögreglan á Suðurnesjum segir að menningar- og fjölskylduhátíðin Ljósanótt hafi gengið vel, en hátíðinni lýkur í dag. Mikið fjölmenni hafi verið í miðbænum í gær en engin alvarleg mál hafi komið upp. Í heild sinn er lögreglan ánægð með allt skipulag í tengslum við hátíðina.
Líkt og undanfarin ár var rekið ungmennaathvarf í samstarfi félagsmálayfirvalda, lögreglu og foreldrafélaga grunnskóla í Reykjanesbæ. Afskipti voru með minna móti en um 20 ungmenni voru færð í athvarfið vegna ölvunar og útivistarbrota, segir í tilkynningu frá lögreglu.
Skemmtanahaldið í miðbænum aðfararnótt sunnudagsins gekk einnig vel fyrir sig þannig að engin alvarleg mál komu upp. Þrír gistu fangahús vegna ölvunar.
Hörð aftanákeyrsla varð á Reykjanesbraut rétt eftir miðnætti aðfararnótt sunnudagisins. Fjórir voru fluttir á sjúkrahús með minniháttar áverka.
Þá var 18 ára ökumaður sviptur ökuleyfi undir morgun eftir að hafa verið mældur á 180 km hraða á Reykjanesbraut á móts við Innri-Njarðvík.