Félag heyrnarlausra fagnar skýrslu um starfsemi Heyrnleysingjaskólans. Árni Sæberg

Félag heyrnarlausra hefur sent frá sér yfirlýsingu þar sem lýst er yfir ánægju með skýrslu nefndar um vist- og meðferðarheimili þar sem m.a. er fjallað um starfsemi Heyrnleysingjaskólans á árunum 1947–1992.

Í yfirlýsingunni segir, að það sé afar  mikilvægt fyrir samfélag heyrnarlausra að fram sé komin  niðurstaða opinberrar  rannsóknar á dvöl heyrnarlausra barna í Heyrnleysingjaskólanum. Áður hafi fulltrúar félagsins vakið athygli stjórnvalda á frásögnum fyrrum nemenda við skólann og óskað eftir aðgerðum stjórnvalda til að upplýsa um málið. Þrátt fyrir þungbæra reynslu fyrrum nemenda við skólann sé það  ákveðinn léttir,  að fram sé komin opinber staðfesting á frásögnum þeirra, frásögnum sem um hafi ríkt þögn.

„Félag heyrnarlausra hvetur stjórnvöld til að fara að tillögum nefndar um vist- og meðferðarheimili þess efnis að tekin verði skýr efnisleg afstaða til framkominna tillagna  um úrbætur í málefnum heyrnarlausra sem raktar eru í skýrslunni. Þá hvetur Félag heyrnarlausra stjórnvöld til að standa vörð um réttindi og þátttöku heyrnarlausra í íslensku samfélagi," segir m.a. í yfirlýsingunni.