Hermann Guðmundsson forstjóri N1. mbl.is/ÞÖK

N1 hyggst ekki verða við áskorun verkalýðsfélags Akraness þess efnis að greiða starfsfólki sínu þær hækkanir sem ella hefðu komið til ef ASÍ og SA hefðu ekki gengið frá frestun á áður umsömdum launahækkunum. VLFA skoraði á N1 að greiða umsamdar hækkanir í ljósi góðrar afkomu en hagnaður af rekstri N1 fyrstu sex mánuði ársins nam 474 milljónum króna.

Í svarbréfi Hermanns Guðmundssonar, forstjóra N1, sem birt er á heimasíðu VLFA, segir að rétt sé að afkoma N1 á fyrri hluta ársins hafi verið viðunandi. Hins vegar sé mikil óvissa um framhaldið. Þá segir að skuldir N1 hafi hækkað mikið á s.l. einu og hálfu ári eins og hjá öllum fyrirtækjum og heimilum landsins. Fyrirsjáanlegt sé að á næstunni verði það hörð barátta að greiða þær niður þannig að þær komist aftur í fyrra horf.

Forstjóri N1 segir að fyrirtækið hafi ekki lækkað laun hjá almennum starfsmönnum. Þá sé mikilvægast nú að tryggja störf og öfugt við mörg önnur fyrirtæki, hafi N1 bætt við um 60 starfsmönnum það sem af er þessu ári.

Í niðurlagi svarbréfsins segir forstjóri N1 að fyrirtækið muni bæta við laun starfsfólks í samræmi við samkomulag sem gert var þ. 25. júní sl. á milli ASÍ og SA.

Vilhjálmur Birgisson, formaður VLFA, segist harma afstöðu forsvarsmanna N1. Hann minnir á að greiðslubyrði almenns verkafólks hafi stórhækkað á undanförnum misserum og á þeirri forsendu hefði verið mjög mikilvægt að verkafólk sem starfar á berstrípuðum lágmarkstöxtum hefðu fengið sínar hóflegu launahækkanir sem áttu að taka gildi 1. mars sl.

„Það er því miður grátlegt fyrir almennt verkafólk að verða af upp undir 100 þúsund krónum vegna linkindar samninganefndar ASÍ við endurskoðun kjarasamninga að undanförnu. Það átti klárlega að tryggja að vel stæð fyrirtæki myndu standa við gerða samninga, fyrirtæki sem starfa í útflutningi og fyrirtæki sem hafa möglunarlaust varpað sínum vanda beint út í verðlagið eins og til að mynda olíufélögin,“ segir formaður VLFA.

Heimasíða VLFA

Vilhjálmur Birgisson, formaður VLFA