Háskóli Íslands. mbl.is/Ómar

Starfsmenn skóla á háskólastigi í nóvember 2008 voru 3048 í 2339 stöðugildum.  Um er að ræða alla starfsmenn í háskólum en starfsmenn sem sinna kennslu voru 2039 í 1334 stöðugildum.

Ekki hafa áður starfað svo margir í háskólum á Íslandi en starfsmönnum hafði fjölgað um 100 frá síðasta skólaári  eða um 3,4%  en um 58 frá skólaárinu 2006-2007 (1,9%). Stöðugildum starfsmanna hefur þó fækkað um 41 frá síðasta skólaári. 

Starfsmenn háskóla við kennslu eru flestir á aldrinum 40-49 ára eða 608 manns í 383 stöðugildum. Næst flestir eru háskólakennarar á aldrinum 50-59 ára eða 584. Í nóvember 2004 voru 10,2% starfsmanna við kennslu 29 ára og yngri. Fjórum árum síðar voru þeir 8% og hefur því fækkað sem nemur 2,2 prósentustigum.

Háskólakennarar á aldrinum 40-49 ára voru 31,2% kennarahópsins haustið 2004 en eru nú 29,8%. Þeim hefur fækkað um 1,4 prósentustig á tímabilinu. Í hópi kennara á aldrinum 50-59 ára hefur kennurum hins vegar fjölgað um 2,4 prósentustig á tímabilinu og í aldursflokki 60 ára og eldri hefur fjölgað sem nemur 2,1 prósentustigi.

Rúmlega helmingur (56,9%) starfsfólks við kennslu eru aðjúnktar og lausráðnir stundakennarar. Stöðugildi þessa hóps eru 525 af 1334 stöðugildum starfsmanna við kennslu eða 39,4%. Prófessorar, dósentar og lektorar eru á bilinu 11-14% háskólakennara hver starfsstétt fyrir sig. Stöðugildi prófessora við kennslu eru 20%, dósenta 15,6% og lektora 18,9% stöðugilda háskólakennara. Samtals eru stöðugildi allra þessara starfshópa við kennslu 93,9% stöðugilda við kennslu en 6,1% eru mönnuð af sérfræðingum, sérhæfðu starfsfólki og stjórnendum.

Þegar háskólakennarar eru taldir eftir starfsheiti og kyni má sjá að kynjamunur er mestur meðal prófessora. Karlar eru 76,2% prófessora en konur 23,8% þeirra. Í hópi lektora er hlutfall kynjanna jafnast en karlar eru 50,9% lektora. Meðal lausráðinna stundakennara og aðjúnkta eru konur 55,7% en karlar eru 44,3%.