Héraðsdómur Reykjavíkur. Ómar Óskarsson

Héraðsdómur Reykjavíkur hefur vísað frá bótakröfu Árna B. Sigurðssonar og fyrirtækis í hans eigu á hendur KPMG hf., tveimur fyrrverandi starfsmönnum KPMG og kaupsýslumanninum Robert Melax. Um er að ræða anga af deilumáli, sem reis vegna fyrirhugaðrar viðarkurlsverksmiðju í Króatíu en málið hefur áður komið til kasta dómstóla.

Upphaf málsins er, að Árni leitaði árið 2007  til fyrirtækjasviðs KPMG og sóttist eftir aðstoð við að stofna einkahlutafélag og finna fjárfesta til samstarfs um viðskiptahugmynd sína, rekstur viðarkurlsverksmiðju í Króatíu. Úr varð að hann keypti félagið FS13 af lager hjá fyrirtækinu CF fyrirtækjasölu, sem er í eigu KPMG. 

Starfsmenn KPMG fengu Róbert Melax til samstarfs við Árna Sigurðsson og FS13. Fyrst átti Róbert aðkomu í gegnum félagið Still River Overseas, en síðar tók annað félag, Standhóll ehf., við öllum réttindum þess. Standhóli var formlega stjórnað af starfsfólki Kaupþings í Lúxemborg, samkvæmt samningi við Róbert.

Í desember 2007, þegar Árni var staddur í Króatíu og vann að viðskiptaáætlun sinni, héldu tveir starfsmenn KPMG, þeir Ágúst Þórhallsson og Hjörtur J. Hjartar hluthafafund í FS13. Niðurstaða fundarins var sú að þeir tveir skipuðu stjórn félagsins, en Hjörtur væri framkvæmdastjóri og prókúruhafi. Árni sakaði þá um að reyna að hafa félagið af sér. Málið var kært til lögreglu sem komst að þeirri niðurstöðu að hluthafafundurinn hefði verið ólöglegur og gaf út ákæru. Í febrúar á þessu ári voru Ágúst og Hjörtur fundnir sekir um  brot gegn lögum um einkahlutafélög með því að senda vísivitandi ranga tilkynningu til Hlutafélagaskrár.

Árni og FS13 höfðaði skaðabótamál á hendur KPMG, Ágústi og Hirti og Róberti og kröfðust samtals rúmlega milljarðs króna í bætur. Héraðsdómur Reykjavíkur komst hins vegar að þeirri niðurstöðu í dag, að bótakröfurnar væru allar vanreifaðar og málsástæður sömuleiðis. Var málinu því vísað frá í heild sinni.