Skáli Ferðafélags Íslands í Þórsmörk Árni Sæberg

Hópur danskra grunnskólanema sem var í Þórsmörk er á leið til Reykjavíkur en samkvæmt upplýsingum frá skálaverði Ferðafélags Íslands í Langadal aðstoðaði hann bílstjóra þeirra við að fara yfir Krossá áðan.

Illfært er yfir árnar á leiðinni í Þórsmörk og er leiðin einungis fær sérútbúnum bifreiðum. Erfitt er að finna vöð yfir ár eins og Steinholtsána og því ekki ráðlagt fyrir aðra en þá sem þekkja staðhætti vel að reyna að fara yfir hana enda sé hún mjög grafin.

Verið er að ferja fólk sem var í Húsadal yfir árnar að sögn skálavarðar í Langadal en engir gestir eru eftir í Langadal. Von er á hópi björgunarsveitarmanna þangað í kvöld.

Dregið hefur úr rigningu og vind í Þórsmörk en veðurspáin er afleit fyrir nóttina og fólk því beðið um að vera ekki á ferðinni af óþörfu.

Á vef Veðurstofunnar kemur fram að  búist er við stormi á SA-verðu landinu undir kvöld og fram á nótt, en NA-lands seint í kvöld og til morguns.

Spá: Vaxandi suðvestanátt, 10-18 m/s síðdegis, hvassast með SA-ströndinni, 18-23 SA-lands með kvöldinu, en NA-lands kringum miðnætti, hvassast á annesjum. Víða rigning eða súld og sums staðar talsverð rigning sunnantil á landinu, en skúrir í kvöld. Dregur úr vindi í nótt. Sunnan- og suðvestan 5-13 á morgun og súld með köflum eftir hádegi, en léttskýjað eða bjartviðri A-lands. Hiti 10 til 18 stig, hlýjast NA-lands.