Sumarútsölum virtist vera lokið í ágúst því þá hækkaði verð á fötum. mbl.is

Velta í dagvöruverslun dróst saman um 5,4% á föstu verðlagi í ágúst miðað við sama mánuð í fyrra og jókst um 11,2% á breytilegu verðlagi.

Þetta er samkvæmt niðurstöðum Rannsóknaseturs verslunarinnar við Háskólann á Bifröst sem reiknar mánaðarlega út smásöluvísitölu. Leiðrétt fyrir árstíðarbundnum þáttum nam samdráttur í veltu dagvöruverslana í ágúst 3,3% frá sama mánuði í fyrra. Verð á dagvöru hækkaði um 17,5% á síðastliðnum 12 mánuðum.
 
Sala áfengis minnkaði um 21,2% í ágúst miðað við sama mánuð árið áður á föstu verðlagi og jókst um 7,1% á breytilegu verðlagi. Verð á áfengi var 35,9% hærra í ágúst síðastliðnum en í sama mánuð í fyrra.
 
Fataverslun var 11,6% minni í ágúst miðað við sama mánuð í fyrra á föstu verðlagi en jókst um 16,1% á breytilegu verðlagi á sama tímabili. Í ágúst dróst fataverslun saman um 9% frá mánuðinum á undan á föstu verðlagi. Sumarútsölum virðist hafa vera lokið í ágúst því verð á fötum hækkaði um 6,1% frá mánuðinum á undan.
 
Velta skóverslunar minnkaði um 6,6% í ágúst á föstu verðlagi og jókst um 11,1% á breytilegu verðlagi miðað við sama mánuð í fyrra. Verð á skóm hækkaði í ágúst um 4,6% á frá mánuðinum á undan.
 
Velta húsgagnaverslana var 47,4% minni í ágúst en í sama mánuði í fyrra á föstu verðlagi og 37,2% minni á breytilegu verðlagi. Í ágúst jókst húsgagnaverslun frá mánuðinum á undan um 16,5% á föstu verðlagi. Verð á húsgögnum lækkaði í ágúst um 3% frá mánuðinum á undan.
 
Sala á raftækjum í ágúst dróst saman um 20,2% á föstu verðlagi frá sama mánuði í fyrra og jókst um 11,4% á breytilegu verðlagi á sama tímabili. Á milli mánaðanna júlí og ágúst jókst raftækjasala  um 42,7% á föstu verðlagi, líklega vegna útsala, að sögn Rannsóknasetursins.