„Mér líður betur og ég er byrjuð að borða pínu,“ segir Alexandra Líf Ólafsdóttir sem er nú óðum að ná sér eftir beinmergsskiptaaðgerð sem hún gekkst undir fyrir fjórum vikum vegna MDS-krabbameins. „Ég fór út í fyrsta skipti í gær. Ég hef ekki farið út í fjórar vikur en við fórum ekki langt og vorum bara hérna fyrir utan,“ segir Alexandra Líf sem býr ásamt foreldrum og þremur yngri systkinum í Danmörku.

„Ég má kannski aðeins fara heim á morgun en litli bróðir minn og systir eru búin að vera með kvef svo þau verða ekki heima,“ segir Alexandra Líf.

Fara varlega vegna sýkingarhættu

Foreldrarnir, Ólafur Páll Birgisson og Kolbrún Björnsdóttir, hafa skipst á að vera hjá Alexöndru Líf en hún er nú laus úr algjörri einangrun. Slík einangrun er nauðsynleg í kjölfar beinmergsskiptaaðgerða, þar sem ónæmiskerfi líkamans verður óvirkt. „Hún varð svo glöð fyrir tveimur dögum því þá mátti mamma hennar knúsa hana almennilega og koma við hana án þess að vera með hanska og grímu,“ segir Ólafur Páll, faðir Alexöndru Lífar.

Tónleikar voru haldnir til styrktar Alexöndru Líf og fjölskyldu á mánudaginn og þar söfnuðust rúmlega fimm milljónir.  Alexandra Líf segir að tónleikarnir hafi verið teknir upp fyrir sig og að fjölskyldan ætli að horfa á þá þegar hún verður komin heim af spítalanum.