mbl.is

Afli íslenskra skipa í botnfiski var 36.623 tonn í ágúst, samkvæmt bráðabirgðatölum Fiskistofu. Mest var um ýsu í aflanum eða 8.787 tonn og þorskur var 8.149 tonn. Nú þegar fiskveiðiárið er nýliðið er 4,6% af því aflamarki sem til ráðstöfunar er í þorski ónýtt. Aflamarksskip eiga 4% ónýtt og krókaaflamarksskip 7,2%.

Fiskistofa segir þetta áþekkt því sem var við lok fiskveiðiársins 2007/2008 en þá höfðu aflamarksskip ekki nýtt 4,4% af aflamarki í þorski en krókaaflamarksskip hins vegar 5,6%.

Aflamark var einnig vannýtt á síðasta fiskveiðiári í fjölmörgum öðrum kvótategundum. Þannig eru 15,2% ýsukvótans vannýtt, rúm 20% ufsakvótans og 12,7% grálúðukvótans.

Aðrar vannýttar kvótategundir eru meðal annars allar þær flatfisktegundir sem eru kvótabundnar nema úthlutað aflamark í keilu, löngu, steinbít og skötusel var fullnýtt á nýliðnu fiskveiðiári.

Heildaraflamarki í þorskígildum talið fyrir fiskveiðiárið 2008/2009 var 312.914 tonn og voru nýttar aflaheimildir 290.112 tonn. Eru því 22.802 tonn eða 7,3% aflaheimilda vannýtt frá síðasta fiskveiðiári.

Aflamark var nánast fullnýtt í þeim uppsjávartegundum sem bundnar eru við fiskveiðiárið þ.e. loðnu og sumargotssíld.

Rúm 500 tonn ónýtt í strandveiðikerfinu

Strandveiðum er lokið og var aflinn 2.010 tonn í ágúst. Þorskur var meginuppistaðan í aflanum eða 1.642 tonn og ufsi var 264 tonn.

Heildaraflinn í strandveiðunum yfir sumarið var 4.104 tonn og var þorskaflinn 3.396 tonn eða 83% af aflanum. Heildaraflamarkið í þorski í
strandveiðikerfinu var 3.955 tonn og náðist því ekki að nýta 546 tonn.
Nokkur aukning er í öðrum afla utan aflamarks milli fiskveiðiára. Mest var aukningin á svokölluðum VS-afla á nýliðnu fiskveiðiári samanborið við fiskveiðiárið 2007/2008 eða um 28% . Aukning í línuívilnun var um 8% og undirmálsafli var rúmlega 1%.

Nánar um fiskafla síðasta fiskveiðiárs