Líklegt er talið að heimsfaraldur inflúensu (H1N1) nái hámarki hér á landi í septembermánuði. Alþjóðaheilbrigðismálastofnunin gerir ráð fyrir að önnur bylgja faraldursins geti borist á norðurhvel jarðar síðar á þessu hausti eða í vetur. Stefnt er að því að bólusetja sem flesta áður en önnur bylgjan ríður yfir en jafnframt er unnið að því að bólusetja gegn árstíðabundinni inflúensu því að enn er óljóst að hve miklu leyti nýi heimsfaraldurinn hefur rutt árstíðabundnu inflúensunni úr vegi. Þetta kemur fram í farsóttarfréttum landlæknisembættisins.

23 af 181 staðfestum tilfellum fengið lyfjameðferð

Þar kemur fram að einkenni sjúkdómsins hafa í fæstum tilfellum verið alvarleg. Dæmigerð einkenni eru hiti, hálssærindi, hósti, höfuðverkur og vöðvaverkir og stöku sinnum væg einkenni frá meltingarvegi (uppköst eða niðurgangur). Flestir ná sér fljótt eftir stutt veikindi.

Einungis 23 af 181 staðfestum tilfellum hafa fengið meðferð með veirulyfjum, 148 fengu enga meðferð en upplýsingar um lyfjameðferð vantar í 10 tilfellum. Vitað er um einn sjúkling sem þarfnaðist innlagnar á sjúkrahús, 18 ára stúlku með undirliggjandi astma, en veikindin voru ekki alvarleg og hún var útskrifuð eftir stutta legu.

Alls eru 3.486 látnir úr svínaflensunni í heiminum, samkvæmt tölum sem WHO birti í dag. Hefur þeim fjölgað um 281 á viku. Flestir þeirra sem hafa látist eru búsettir í Ameríku, það er suður, norður og mið-Ameríku. En alls eru skráð dauðsföll þar 2.625. Í Evrópu eru 140 látnir, Miðausturlöndum 61 og fjörtíu í Afríku.

Sjá nánar