Gróðursetning og uppgræðsla gekk vel í Hekluskógum í sumar. Var það með afbrigðum veðursælt, bæði sólríkt og hlýtt en þó rigndi líka með hæfilegu millibili, að mati verkefnastjóra, Hreins Óskarssonar.

Á vef Hekluskógar má sjá að uUm fjögur hundruð þúsund plöntur, aðallega birki en þó eitthvað af reynivið líka, voru gróðursett á svæðinu í vor og fyrripart sumars. Gróðursettu landeigendur um helming plantnanna og verktakar og sjálfboðaliðahópar afganginn. Er reiknaður er kostnaður við hverja gróðursetta plöntu út frá framlagi ríkisins kemur í ljóst að heildarkostnaður við hverja gróðursetta plöntu nemur 49,6 krónum.

Vegna niðurskurðar hafði Hekluskógaverkefnið ekki fjármagn til áburðargjafa eða sáninga eins og undanfarin ár. Skógrækt ríkisins greiddi hluta launa verkefnisstjóra Hekluskóga sem einnig starfar sem skógarvörður á Suðurlandi. Hlupu þá nokkrir aðilar undir bagga varðandi uppgræðsluverkefni og lagði Landgræðsla ríkisins til 30 tonn af tilbúnum áburði og greiddi fyrir dreifingu á mestum hluta þess, en auk þess dreifðu bændur á Rangarvallaafrétti nokkrum tonnum.  Þá lagði Landsvirkjun til áburð og dreifði honum yfir nokkra ha lands og Kjötmjölsverksmiðjan lagði til 150 tonn kjötmjöls sem notað var til að hressa upp á sáningar í Þjórsárdal. Var kjötmjölinu dreift af starfsfólki Skógræktar ríkisins með aðstoð Landsvirkjunar. Aðrir aðilar sem dreifðu áburði og gróðursettu tré voru Slóðavinir, ferðaklúbburinn 4x4 og  St. Andrésarstúkan Hekla.

Starfsfólk Heklu hf kom líkt og undanfarin ár og gróðursetti í uppgræðslusvæði í Merkihvolslandi en auk þess hefur fyrirtækið stutt við Hekluskóga með því að greiða fyrir kolefnisbindingu fyrirtækisins sem og nýrra seldra Volkswagen bifreiða.

Haustgróðursetning í Hekluskógum hefst í lok mánaðarins og verða gróðursettar um 100 þúsund birkiplöntur, auk smáræðis af reyniviði.