Talsvert hefur fundist af spánarsniglum undanfarið og það jafnvel á stöðum sem hann hefur ekki fundist á áður. Flestir hafa spánarsniglarnir fundist í Kópavogi, en einnig á Hofsósi, Vestmannaeyjum og Mosfellsbæ.

Um miðjan júlí fannst spánarsnigill á Hofsósi. Hann var reyndar í kínakáli sem pakkað var í Hollandi og flutt þaðan í verslun á Hofsósi. Þar var því um tilfallandi atvik að ræða.

Tíu dagar liðu af ágúst þar til spánarsnigill fannst í Mosfellsbæ, en þar um slóðir hafði hann ekki fundist áður, og annar í Kópavogi. Spánarsnigill fannst í garði í Vestmannaeyjabæ 7. september og var færður Náttúrugripasafninu þar. Síðan fannst annar þar í bæ 17. september sem bendir til þess að sá fyrri hafi ekki verið tilfallandi.

„Þá var komið að stórri sprengju,“ segir á vef Náttúrufræðistofnunar. „Hinn 10. september barst Náttúrufræðistofu Kópavogs spánarsnigill sem fannst þar í bæ og er hann þar til sýnis lifandi ásamt þeim fyrri sem stofan fékk í hendur. Daginn eftir var komið með 13 slíka til Náttúrufræðistofnunar Íslands frá þeim sama stað í Kópavogi. Þeir höfðu verið tíndir úr hrúgu af plöntuúrgangi. Það fylgdi sögunni að einn hefði sést þar á staðnum fyrr í sumar.“

Spánarsniglar halda sig gjarnan til hlés þegar þurrkar ríkja og leita þangað sem raka er að finna þar til blotnar um. Náttúrufræðistofnun hefur þó í sumar borist fjöldi meintra spánarsnigla frá vökulu fólki en sem betur fer stóðust þeir fæstir spænskuprófið, segir á ni.is. aij@mbl.is