Kristinn Örn Jóhannesson mbl.is

Stjórn VR sjái ekki um rannsókn þegar komi að ásökunum um brot fyrrum stjórnar lífeyrissjóðsins gegn samþykktum hans. Formaðurinn segir núverandi fulltrúa VR í stjórn lífeyrissjóðsins njóta fulls stuðnings stjórnar VR. Þetta kemur fram á vef VR.

Stjórnendur lífeyrissjóða bundnir þagnarskyldu

Á vef Fjármálaeftirlitsins kemur fram að þagnarskylda ríki um stjórnendur lífeyrissjóða samkvæmt lögum sem gilda um starfsemi lífeyrissjóða.

Er þar vísað til frétta um að Fjármálaeftirlitið telji að ákvæði laga um bankaleynd hindri ekki stjórn Lífeyrissjóðs verzlunarmanna í að veita stjórnarmönnum í VR upplýsingar sem þeir hafa falast eftir.

„Til útskýringar vill Fjármálaeftirlitið árétta að bankaleynd eins og hún er skilgreind í lögum um fjármálafyrirtæki (58. Gr.-60. Gr.) gildir ekki um lífeyrissjóði heldur eingöngu um fjármálafyrirtæki. Lög nr. 129/1997 gilda hins vegar um starfsemi lífeyrissjóða, en 32. gr. þeirra laga fjallar um þagnarskyldu stjórnenda lífeyrissjóða. Þar segir: „Stjórnarmenn, framkvæmdastjóri og aðrir starfsmenn, svo og endurskoðendur lífeyrissjóðs, eru bundnir þagnarskyldu um allt það sem þeir fá vitneskju um í starfi og leynt á að fara samkvæmt lögum eða eðli máls. Þagnarskylda helst þótt látið sé af starfi.“

Eins og fram hefur komið í fréttum RÚV hafa tveir stjórnarmenn í VR lagt fram kæru til Fjármálaeftirlitsins þar sem þeir halda því fram að fyrrum stjórnendur Lífeyrissjóðs verzlunarmanna hafi brotið gegn samþykktum sjóðsins og lögum um lífeyrissjóði. Málið kom inn á borð stjórnar VR fyrir nokkrum mánuðum, þar sem það átti alls ekki heima segir Kristinn Örn Jóhannesson, formaður VR.

„Ég benti stjórnarmönnunum á það strax í upphafi  að þeim bæri að leita til yfirvalda með grunsemdir sínar og ásakanir, stjórn VR væri hvorki rannsóknaraðili né úrskurðaraðili í málefnum lífeyrissjóðsins,” segir á vef VR.