Segir um misskilning sé að ræða

Þorsteinn Már Baldvinsson, fyrrverandi stjórnarformaður Glitnis, segir í yfirlýsingu að fullyrðingar Jóns Bjarnasonar, sjávarútvegs- og landbúnaðarráðherra, um að stjórnendur Glitnis hafi hugsanlega framið lögbrot, er bankinn lagði lítinn hluta lána bankans til sjávarútvegsfyrirtækja að veði fyrir láni hjá Seðlabanka Evrópu,sé á misskilningi byggð.

„Vegna ummæla sjávarútvegs- og landbúnaðarráðherra um að stjórnendur Glitnis hafi hugsanlega framið lögbrot, er bankinn lagði lítinn hluta lána bankans til sjávarútvegsfyrirtækja að veði fyrir láni hjá Seðlabanka Evrópu, vill undirritaður taka eftirfarandi fram.

Fullyrðing ráðherrans um hugsanlegt lögbrot er á misskilningi byggð. Íslenskum sjávarútvegsfyrirtækjum er heimilt að taka lán beint hjá erlendum aðilum og hafa þau gert það í tugi ára. Norskir bankar hafa í fjöldamörg ár, svo dæmi sé tekið, fjármagnað nýsmíðar íslenskra fiskiskipa í Noregi með fyrsta veðrétti í viðkomandi skipum.

Á sama hátt er íslenskum lánastofnunum heimilt að setja kröfur sínar á hendur íslenskum sjávarútvegsfyrirtækjum að veði til tryggingar skuldum sínum við erlenda aðila. Komi til þess að erlendir aðilar þurfi að ganga að veðum í íslenskum fiskiskipum er þeim hinsvegar óheimilt að gera þau út og þurfa að selja þau innan tiltekins tíma.

Ríkisstjórn Íslands hefur á síðustu mánuðum staðið í viðræðum við kröfuhafa um hugsanlegt eignarhald þeirra á íslensku bönkunum. Verði það niðurstaðan að Kaupþing og Íslandsbanki verði að hluta til í eigu erlendra aðila þá verður það löglegt að viðkomandi bankar fjármagni íslenskan sjávarútveg, þrátt fyrir erlent eignarhald á þeim.

Íslensku atvinnulífi er nú mjög mikilvægt að eiga aðgang að erlendu lánsfé. Það er sannfæring mín að þegar sjávarútvegsráðherra hefur kynnt sér málið til hlítar mun renna upp fyrir honum að viðskipti Glitnis við Seðlabanka Evrópu eiga ekkert skylt við lögbrot," að því er segir í yfirlýsingu frá Þorsteini Má Baldvinssyni.

• 9 blogg um fréttina

Bloggað um fréttina

• Guðmundur Ásgeirsson: Þorsteinn Már er Georg Bjarnfreðarson
• Jakob Falur Kristinsson: Misskilningur
• Andri Geir Arinbjarnarson: "Muna hlustendur eftir orðinu: misskilningur"
• Guðbjörn Jónsson: Voru aflaheimildir veðandlag ??????
• Jón Ingi Cæsarsson: Hvor hefur rétt fyrir sér ?
• Níels A. Ársælsson.: Ekki um misskilning að ræða hjá ráðherra
• Vilhjálmur C Bjarnason: Einn stór misskilningur.....
• Jakobína Ingunn Ólafsdóttir: LÍÚ á met í þvæluhugtökum og skröksögum
• Axel Jóhann Axelsson: Rétt hjá Þorsteini Má