mbl.is

Eftir Jón Pétur Jónsson - jonpetur@mbl.is

Það eru einkum þrír þættir sem eru þess valdandi að Ísland fellur í ár um sex sæti yfir samkeppnishæfustu ríki heims miðað við árið 2008. Á Íslandi er lítill efnahagslegur stöðugleiki, fjármálamarkaðurinn vanþróaður og markaðurinn lítill.

Irene Mia, hagfræðingur og framkvæmdastjóri hjá Alþjóðaefnahagsráðinu, bendir á að í fyrra hafi Ísland verið í sjötta sæti, af 134 hagkerfum, hvað varðar efnahagslegan stöðugleika. Nú er Ísland í 119. sæti af 133. hagkerfum, sem sé bein afleiðing bankahrunsins. 

Hvað varðar þróun fjármálamarkaðarins hér á landi þá hafi Ísland verið í 20. sæti í fyrra, en sé nú í 85. sæti.

Hvað varðar gæði íslenska bankakerfisins þá var Ísland í 36. sæti í fyrra, en er nú nánast á botninum í 130. sæti.

Hún tekur fram að lítið sé hægt að gera hvað varðar stærð markaðarins hérlendis, en hægt sé að koma á stöðugleika og þróa fjármálakerfið.

Mia fjallaði um samkeppnishæfni Íslands út frá samkeppnisvísitölu Alþjóðaefnahagsráðsins á morgunfundi undir yfirskriftinni: „Endurreisn: Sóknarfæri og samkeppnishæfni“.

Mia, sem er einn skýrsluhöfunda The Global Competitiveness Report 2009-2010, tekur hins vegar fram að Ísland standi sig vel á mörgum sviðum, og nefndi hún heilbrigðismál, menntamál, innviði samfélagins og íslenskt hugvit sem dæmi. Þar væru Íslendingar á meðal fremstu þjóða. Mia benti jafnframt á að Ísland ætti að einbeita sér að efla íslenskt hugvit, því þar séu sóknartækifæri landsins.

Sviss er nú í efsta sæti yfir samkeppnishæfustu hagkerfi heimsins, samkvæmt mælingu Alþjóðaefnahagsráðsins (World Economic Forum, WEF) í Genf. Ísland fellur um sex sæti yfir samkeppnishæfni þjóða, úr 20. sæti í 26. sæti, og er neðst Norðurlandaþjóðanna fimm.