Birkir Hólm Guðnason, framkvæmdastjóro Icelandair, Halldór Guðmundsson, verkefnisstjóra „Sagenhaftes Island“ og Sigtryggur Magnason.

Icelandair og verkefnið „Sagenhaftes Island – heiðursgestur bókasýningarinnar í Frankfurt 2011“ undirrituðu í dag samstarfssamning, sem felur í sér að flugfélagið veitir verkefninu styrk í formi flugmiða og afsláttar á flugmiðum.

Fram kemur í tilkynningu að Ísland verði heiðursgestur á stærstu bókasýningu heims árið 2011. Sýningin er haldin árlega í Frankfurt í Þýskalandi. Undir kjörorðinu „Sagenhaftes Island“ sé unnið að kappi að því að íslenskar bókmenntir verði þýddar og gefnar út í Þýskalandi og víðar.

Jafnframt muni verða haldnar sýningar á íslenskri myndlist í Þýskalandi árið 2011 og efnt til margvíslegra annarra menningarviðburða. Í því sambandi muni fjöldi íslenskra rithöfunda og annarra listamanna sækja Þýskaland heim og kynna menningu og list þjóðarinnar.

Icelandair, sem haldi uppi áætlunarflugi til áfangastaða í Þýskalandi, þar á meðal Frankfurt, muni leggja verkefninu lið með því annars vegar að gera því kleift að bjóða hingað fjölda þýskra fjölmiðlamanna alveg fram til haustsins 2011, og með því að veita verkefninu afslátt á flugmiðum til Þýskalands.