Ragna Árnadóttir. mbl.is/Kristinn

Eftir Skúla Á. Sigurðsson skulias@mbl.is

Ljóst er að skipan lögreglu- og sýslumannsumdæma mun taka miklum breytingum til að mæta yfirvofandi niðurskurði og hagræðingu í stjórnsýslunni. Munu umdæmin verða færri og stærri en hingað til.

Ekki liggur fyrir ennþá hve mikil fækkunin verður en Ragna Árnadóttir, dóms- og kirkjumálaráðherra, hefur fallist á tillögur starfshóps um að fækka lögregluumdæmum úr fimmtán í sex. Þá voru hugmyndir um að sýslumannsumdæmi á landinu yrðu sjö í stað 24 kynntar á aðalfundi Sýslumannafélags Íslands á fimmtudaginn.

Breytingar á skipan lögregluumdæma eru nú undirbúnar af sérstökum starfshópi á vegum ráðherra og er vinna við frumvarp til laga þar að lútandi hafin. Fallist Alþingi á tillögur ráðherra er gert ráð fyrir að breytingarnar taki gildi um næstu áramót. Stækkun lögregluumdæma er talin munu styrkja embættin og til umræðu er að verkefni miðlægrar þjónustu ríkislögreglustjóra verði færð á þeirra hendur.

Hugmyndir um stækkun sýslumannsembætta eru þó skemur á veg komnar og er vinnan á frumstigi. Á næstunni verður skipuð verkefnisstjórn sem mun meta stöðuna og gera tillögur um nánari útfærslur breytinganna.

„Markmiðið með stækkun sýslumannsembætta er að gera embættin að sterkari rekstrareiningum þannig að þau verði í stakk búin til að mæta hagræðingarkröfu en um leið veita fjölbreytta þjónustu,“ segir Þórunn J. Hafstein, settur ráðuneytisstjóri í ráðuneyti dóms- og kirkjumála.

Hún segir að þó embættum fækki sé ætlunin að þau hafi útibú víða um land, líklegast á þeim stöðum þar sem sýslumannsembættin eru nú og jafnvel víðar. Ekki stendur til að skerða þjónustu embættanna en nánari útfærsla á því er undir fjárveitingum komin.

„Við stefnum að því að halda fækkun starfsmanna í lágmarki, við erum mjög meðvituð um að sýslumannsembættin búa yfir mikilvægri reynslu og þekkingu,“ segir Þórunn. Í stað þess að segja fólki upp störfum verður leitast við að færa starfsmenn til innan stjórnsýslunnar og halda þannig í þann styrk sem í mannauðnum býr.