„Ég vil geta sagt við Breta og Hollendinga: „Það er meirihluti fyrir þessari sameiginlegu niðurstöðu [í Icesave-málinu] eins og það liggur fyrir þó að það geti breyst á þingi og þið verðið í framhaldinu að losa um það svo við getum farið í að endurskoða áætlun Alþjóðagjaldeyrissjóðsins.“ Þetta get ég ekki sagt nema ég hafi ríkisstjórnina og þingflokkana báða á bak við mig.“

Þetta sagði Jóhanna Sigurðardóttir forsætisráðherra á fundi Samfylkingarinnar í gærkvöldi. Hún sagði að Ögmundur Jónasson, sem í gær sagði af sér embætti heilbrigðisráðherra, hefði ekki verið tilbúinn til að fara þessa leið. Hann hefði lagt til að málið yrði lagt að nýju fyrir þingið og reynt að ná um það breiðri pólitískri samstöðu. Jóhanna sagðist ekki treysta sér til að leggja málið „galopið“ fyrir þingið.

Jóhanna sagði að í viðræðum við Hollendinga og Breta hefðu íslensk stjórnvöld lagt til að þau hefðu heimild til að leggja málið fyrir dómstóla og að niðurstaða þeirra hefði síðan áhrif á hversu mikið Íslendingar greiddu af Icesave-skuldbindingunum. Bretar og Hollendingar hefðu sagt að ef þessi leið yrði farin gerðu þeir kröfu um að neyðarlögin yrðu opnuð að nýju þar sem í þeim hefði falist mismunun milli íslenskra og erlendra kröfuhafa.

Bæði Jóhanna og Steingrímur J. Sigfússon fjármálaráðherra sögðu eftir ríkisstjórnarfund í gær að einhugur ríkti um að halda stjórnarsamstarfinu áfram. Mikill titringur var í báðum flokkunum vegna málsins í gær. Þingflokkur VG ætlaði í gærkvöldi að taka afstöðu til þess hvort flokkurinn gæfi Steingrími umboð til að ganga frá málinu. Fundinum var ekki lokið á miðnætti.

Gagnrýna vinnulag stjórnarinnar

„Ég segi af mér eftir að mér hefur verið gert ljóst að ríkisstjórnin þurfi að vera algerlega samstiga í Icesave-málinu,“ segir Ögmundur Jónasson, sem baðst lausnar úr embætti heilbrigðisráðherraí gær. Hann leggur áherslu á að Alþingi fjalli um málið, gagnrýnir vinnulag stjórnarinnar og segir það ekki leysast nema með samstillingu allra. Lilja Mósesdóttir, þingmaður VG, tekur í sama streng. „Ef á núna að fara í gamla hjólfarið og tryggja meirihluta fyrir einhverjum breytingartillögum ríkisstjórnarinnar, þá er það eins og við séum að gefast upp á miðri leið í því lýðræðislega ferli sem við byrjuðum á í sumar. Ég get ekki séð að það sé það mikil nauðsyn á að ljúka þessu hér og nú.“