Hæstiréttur. Sverrir Vilhelmsson

Hæstiréttur hefur staðfest dóm Héraðsdóms Reykjavíkur yfir karlmanni á sjötugsaldri sem braut kynferðislega gegn andlega vanheilli konu. Maðurinn var dæmdur í fimmtán mánaða fangelsi og til að greiða konunni 600 þúsund krónur í miskabætur.

Maðurinn neitaði sök og byggði sýknukröfu sína á að hann hefði ekki haft kynferðismök við konuna og ekki vitað að hún væri haldin andlegum annmörkum. Samkvæmt álitsgerðum tveggja sálfræðinga er greind konunnar neðarlega á stigi vægrar þroskahömlunar. Fötlun hennar er umtalsverð og augljós. „Erfiðleikar komi fram hjá henni í mállegri, verklegri og óyrtri rökhugsun og ályktunarhæfni,“ segir m.a. í dómnum. Konan er 75% öryrki.

Maðurinn og konan hafa þekkst í sjö til átta ár og hafa þau haft kynferðisleg samskipti nokkrum sinnum, og greiddi maðurinn oftast fyrir þau. Bæði eru þau í hjónabandi, og hefur konan verið gift sama manninum í 29 ár. Áður var hún gift öðrum í sex mánuði.

Brot mannsins áttu sér stað á skrifstofu hans að kvöldi í júní árið 2007. Þá bauð hann konunni að koma til að skoða skrifstofuna. Þau ræddu fyrst saman en fljótlega sagði maðurinn henni að fara úr fötum og leggjast upp í sófa. Konan hlýddi en samkvæmt framburði hennar þorði hún ekki annað og vildi ekki „gera uppreisn“.

Að sögn konunnar notaði maðurinn kynlífsleikfang við aðfarirnar. Hún hefði mótmælt og komist undan við illan leik. Hringdi hún þá á eiginmanninn sem sótti hana.

Maðurinn neitaði að hafa notað kynlífsleikfang en viðurkenndi hjá lögreglu að hafa „hjálpað henni með puttanum svona eitthvað smotterí.“ Fyrir dómi sagði maðurinn hins vegar að ekkert kynferðislegt hefði gerst.