Steingrímur J. Sigfússon fjármálaráðherra heldur utan til Istanbúl í Tyrklandi í dag til að sækja ársfund Alþjóðagjaldeyrissjóðsins, AGS. Þar mun hann m.a. eiga fundi með fjármálaráðherrum Hollands og Bretlands, og gera úrslitatilraun til að ná samkomulagi við þessar þjóðir, sem síðustu vikur hafa gert athugasemdir við þá fyrirvara sem Alþingi samþykkti í lok ágúst sl. Hafa þær athugasemdir komið fram í formlegum og óformlegum viðræðum embættismanna.

Stjórnarandstaðan hefur gagnrýnt að þessar viðræður færu fram án þess að nýtt samningsumboð hefði verið veitt, og einnig gagnrýnt lítið upplýsingaflæði um gang viðræðna. Samkvæmt heimildum blaðsins var það einnig ein meginástæða þess að Ögmundur Jónasson sagði af sér sem heilbrigðisráðherra, að hann var ósáttur við vinnubrögðin í Icesave-málinu síðustu vikur. Leit hann svo á að verið væri að fara framhjá vilja Alþingis með viðræðum um nýtt samkomulag. Frekar hefði átt að fara með málið fyrir þingið að nýju vegna breyttra forsendna og skipa nýja samninganefnd.

Getgátur gluggagægis?

Hvort sem það kallast viðræður eða samskipti hafa stjórnvöld og íslenskir embættismenn með einum eða öðrum hætti verið í sambandi við Hollendinga og Breta síðan Alþingi samþykkti fyrirvarana í lok ágúst sl. Fljótlega eftir það, eða 2. september, fóru íslenskir embættismenn til fundar við Breta og Hollendinga í borginni Haag í Hollandi.

Fer tvennum sögum af því hvort afstaða þjóðanna til fyrirvaranna hafi komið fram á þessum fundi. Í frægri bloggfærslu á netinu var greint frá því að farþegar á almennu farrými í vél Icelandair frá Kaupmannahöfn að kvöldi 2. september hefðu orðið vitni að því þegar helsti samningamaður Íslands, Indriði H. Þorláksson, ritaði minnisblað á fartölvu sinni til fjármálaráðherra. Á þar að hafa komið fram að fulltrúar Breta og Hollendinga samþykktu ekki fyrirvara Alþingis. Þessu hefur Indriði neitað harðlega og sagt „getgátur gluggagægja“ ekki svaraverðar. Daginn eftir, hinn 3. september, var ríkisstjórn og fjárlaganefnd gerð grein fyrir fundinum í Hollandi. Þá kom fram opinberlega að ekkert væri vitað um afstöðu Hollendinga og Breta. Hún kom hins vegar fram um miðjan september þegar íslenskir embættismenn áttu annan fund með fulltrúum þjóðanna í London. Daginn eftir, 17. september, fengu ríkisstjórn og fjárlaganefnd kynningu á Lundúnafundinum, auk þess sem þingflokkar komu saman. Á þessum tímapunkti þótti ljóst að Hollendingar og Bretar vildu lengri ríkisábyrgð en til ársins 2024 eða tryggingu fyrir því að mögulegar eftirstöðvar fengjust greiddar. Einnig var deilt um dómstólaleiðina eins og fram hefur komið.

Eftir því sem liðið hefur á þessar viðræður hefur aukin harka fæst í þær, einkum af hálfu Hollendinga. Er viðræðunum ekki lokið enn en þær hafa að mestu leyti verið í höndum sömu embættismanna og skipuðu samninganefnd Íslands vegna Icesave-samninganna, undir forystu Indriða H. Þorláksonar, aðstoðarmanns fjármálaráðherra. Fleiri embættismenn hafa tekið þátt í viðræðunum, m.a. ráðuneytisstjóri forsætisráðuneytisins og fulltrúi frá Tryggingasjóði innistæðueigenda.

Því er vísað á bug í fjármálaráðuneytinu að ný samninganefnd hafi verið skipuð. Ekki hafi verið um eiginlegar samningaviðræður að ræða heldur „sameiginlega skoðun“ á því hvernig unnt sé að samræma Icesave-samningana og skilmála Alþingis.

Ráðherrar funda með stjórnarandstöðunni

Áður en Steingrímur J. Sigfússon fjármálaráðherra fer utan til Tyrklands í dag á ársfund AGS mun hann ásamt Jóhönnu Sigurðardóttur forsætisráðherra eiga fund með stjórnarandstöðunni um stöðu Icesave-málsins. Óskaði Bjarni Benediktsson, formaður Sjálfstæðisflokksins, eftir slíkum fundi í gær. Mun sá fundur fara fram í morgunsárið áður en ríkisstjórnin kemur saman.

Guðfríður Lilja Grétarsdóttir var fyrsti kostur þingmanna VG sem arftaki Ögmundar Jónassonar í heilbrigðisráðuneytinu. En hún hafnaði og bar við sams konar forsendum og Ögmundur þegar hann hætti.