Helgi Björnsson í hlutverki sínu kvikmyndinni í Reykjavík Whale Watching Massacre sem frumsýnd var í haust.

Formenn allra kvikmyndafélaga á Íslandi hittust á fundi með framkvæmdastjóra Kvikmyndamiðstöðvar til að ræða það að framlög til kvikmyndasjóða verði skorin niður um 200 milljónir kr. Fram kemur í fréttabréfi Sambands íslenskra kvikmyndaframleiðenda að talið sé að yfir 100 ársverk tapist við þennan niðurskurð.

Þar segir jafnframt að þetta sé bein aðför að mannaflsfrekri sprotagrein sem hafi verið í hvað örustum vexti hin síðastu ár.

Stjórn SÍK hefur einnig fundað um málið hefur þegar sett í gang vinnu við að koma á framfæri upplýsingum um hvað slíkur niðurskurður geti haft í för með sér, og hvernig 34% niðurskurður á kvikmyndasjóðum sé úr takti við nokkur önnur menningarframlög í fjárlagafrumvarpinu.

„Stjórn SÍK mun vinna mjög ákveðið í þessu máli á næstunni og m.a. er búið að koma á fundi með menntamálaráðherra og verið er að vinna að því að komast til botns í því hvernig standi á því að þessi stórfelldi niðurskurður bitni eingöngu á einni menningartengdri grein.

Þessi niðurskurður er einnig mjög undarlegur í ljósi þeirrar staðreyndar að framlög úr kvikmyndasjóði sexfaldasta að meðaltali við öflun annars fjármagns til kvikmyndagerðar. Það þýðir að 200 milljónir verða að 1.200 og miðað við 27% meðalskattheimtu myndu 325 milljónir rennu aftur í ríkissjóð.

Bein áhrif þessa niðurskurðar eru talin þau að á næsta ári verði ekkert úr framleiðslu tveggja kvikmynda, tveggja sjónvarpsþáttaraða og að minnsta kosti 4-5 heimilda- og stuttmynda,“ segir á vef SÍK.