Heimdallur, félag ungra sjálfstæðismanna í Reykjavík, gagnrýnir forgangsröðun ríkisstjórnarinnar í ríkisfjármálum og skattamálum. Ljóst er að ríkisstjórnin fer leið skattahækkana í stað þess að taka til í rekstri ríkisins og fresta eða leggja af ýmis gæluverkefni og verkefni á vegum hins opinbera.

Þetta kemur fram í ályktun félagsins sem var samþykkt í kvöld. Hún er eftirfarandi:

„Ókostir skattahækkana eru vel þekktir og er sérstaklega brýnt í núverandi aðstæðum að íþyngja ekki launþegum og atvinnurekendum ofan á allt annað. Aukin skattheimta mun draga úr ráðstöfunartekjum heimilanna, auka á samdráttinn í atvinnulífinu sem aftur leiðir til aukins atvinnuleysis. Hærri skattar þýða minni framleiðni þar sem hvatinn til athafna verður því minni sem skattprósentan er hærri. Þá er hætta við því að aukin skattheimta leiði til svartrar atvinnustarfsemi.
 
Heimdallur hvetur ríkisstjórnina til að leita annarra og skynsamlegri leiða við að leiðrétta fjárlagahallann. Mikil útþensla ríkissjóðs undanfarin ár veitir svigrúm til niðurskurðar og hagræðingar í ríkisrekstri. Ljóst er af fjárlagafrumvarpi ríkisstjórnarinnar að ríkið er enn að verja almannafé í gæluverkefni. Það eru ótrúleg skilaboð á sama tíma og skattar eru hækkaðir á fjölskyldur í landinu sem berjast við að ná endum saman, að ráðherrar ríkisstjórnarinnar skammti sér tugi milljóna í ráðstöfunarfé. Að sama skapi er ráðist í ýmis verkefni sem bera ekki með sér að ríkissjóður sé í miklum vanda, t.d. að milljónum króna sé varið í ritun Biskupasögu og rekstur listskreytingarsjóðs, hálfum milljarði sé varið í „verðmiðlun landbúnaðarvara“, tugum milljóna í „jöfnunarsjóð alþjónustu“ og nokkrum milljónum í „garðávaxtasjóð“, svo nokkur dæmi séu nefnd.
 
Þá telur stjórn Heimdallar miður hve illa stjórnvöld hafa tekið í hugmyndir um aukna tekjuöflun hins opinbera eftir öðrum leiðum en hækkun tekjuskatta, s.s. með því að skattleggja inngreiðslur í lífeyrissjóði. Sú aðgerð gæti fært ríkissjóði tugi milljarða í tekjur en hlaut ekki náð fyrir eyrum stjórnvalda.
 
Fólkið í landinu stendur ekki undir frekari skattahækkunum eftir þau áföll sem á hafa dunið. Það er þversögn hjá ríkisstjórninni að ætla í öðru orðinu að aðstoða skuldugt, ungt fólk, en þyngja í hinu orðinu álögur á þennan hóp og gera því þannig erfiðara um vik að vinna sig út úr vandanum.
 
Leiðin út  úr kreppunni er verðmætasköpun. Heimdallur hvetur ríkisstjórnina til að skapa þau skilyrði að atvinnulífið geti starfað á ný. Þannig verða til fleiri störf með fleiri skattgreiðendum og fyrirtækjum sem starfa og greiða skatta.“