Biður þjóðina afsökunar
Alþingismenn á þingi. mbl.is/Árni Sæberg
Jóhanna Sigurðardóttir sagði á Alþingi í dag, að sér væri það skylt sem forsætisráðherra, að biðja íslensku þjóðina afsökunar fyrir hönd ríkisins og stjórnsýslunnar á þeirri vanrækslu og því andvaraleysi sem leiddu meðal annars til bankahrunsins á síðasta ári.
„Bankarnir brugðust, stjórnkerfið brást, stjórnmálin brugðust, eftirlitskerfið brást, fjölmiðlarnir brugðust, hugmyndakerfi hins frjálsa markaðar brást og það hafa efalítið verið teknar margar rangar ákvarðanir sem leiddu okkur í þessa erfiðu stöðu," sagði Jóhanna.
Hún sagðist m.a. heyra það á fólki sem kunni á viðskiptalífinu og verðbréfaviðskiptum, að ekki hafi átt sér stað nægilega miklar breytingar í bankakerfinu og enn sætu sömu klíkurnar og hagsmunahóparnir enn að kjötkötlunum víða í samfélaginu. Þetta viji ríksistjórnin og almenningu sjá breytast.
Þá sagði Jóhanna, að megináherslur ríkisstjórnarinnar í efnahagsmálum væru tvær: Í fyrsta lagi að koma Íslandi út úr kreppunni eins fljótt og hægt er á grundvelli norrænna velferðargilda og í öðru lagi að koma í veg fyrir að hrun af þessu tagi endurtaki sig.
„Við þurfum að kveðja ár hrunsins og horfa fram á veginn," sagði Jóhanna. „Þótt margt hafi breyst í hruninu, þá breytist það aldrei að Ísland er og verður land tækifæranna en það er í okkar höndum hvernig þau tækifæri verða nýtt."
|
Munnleg skýrsla forsætisráðherra til Alþingis |
