Ekki kreppa í bókaútgáfu
Bækur og bókakiljur Þorvaldur Örn Kristmundsson
eftir Einar Fal Ingólfsson
„Þetta er langviðamesta útgáfa sem við höfum ráðist í. Þegar eru komnar úr prentun 17 bækur á árinu og titlarnir verða um 35 í allt,“ segir Kristján Kristjánsson útgefandi hjá Uppheimum á Akranesi. Í fyrra gáfu Uppheimar út um 20 bækur. Ýmissa grasa kennir á útgáfulistanum. Meðal annars eru ljóðabækur eftir Ísak Harðarson, Njörð P. Njarðvík, Gyrði Elíasson og Gunnar M. Gunnarsson. Þá vekur athygli að Böðvar Guðmundsson er með nýja sögulega skáldsögu.
„Enn er morgunn er stór og mikil söguleg skáldsaga eftir Böðvar. Hún gerist á fyrri hluta 20. aldar og rekur mikla örlagasögu þýsks gyðings sem hrekst til Íslands. Þetta er tónlistarmaður sem kemur sér fyrir í reykvísku samfélagi,“ segir Kristján. „Þetta er sterk bók sem ég tel eiga erindi við samtímann.
Við erum að vinna að skáldsögu eftir Kristínu Ómarsdóttur sem heitir Hjá brúnni. Sem fyrr er mikill sprengikraftur í Kristínu og mikil póesía. Þá er Ævar Örn Jósepsson með bók, eða svo segir hann! Hann var að skrifa fram eftir nóvember í fyrra, enn er bara októberbyrjun þannig að ég er sallarólegur ennþá.“ Kristján hlær. „Ég get ekkert sagt um þá bók, hann getur tekið uppá því að endurskrifa hana ef það dregur til tíðinda í íslensku samfélagi.
Bjarni Bjarnason sendir frá sér skáldsögu, ansi magnað verk sem heitir Leitin að Audrey Hepburn og er öðrum þræði sjálfsævisögulegt skáldverk. Finnbogi Hermannsson er að vinna framhald bókarinnar Í húsi afa míns, bók sem hefur vinnuheitið Í fótspor afa míns. Það handrit stendur tæpt en ég hef grun um að það muni koma út. Landið sem aldrei sefur eftir Ara Trausta Guðmundsson mætti flokka sem tilraunakennda ferðaskáldsögu.“
Íslendingar hliðhollir bókinni
Uppheimar gefa út þrjú greinasöfn, Sporaslóð, sagnaþætti eftir Braga Þórðarson, Boðskort í þjóðarveislu, safn greina um gildi, samfélag og bókmenntir eftir Bjarna Bjarnason, og Gleymskunnar bók, greinasafn um bókmenntir eftir Magnús Sigurðsson.Eitt stærsta þýðingarverk ársins er Óþekktur hermaður eftir Vainö Linna sem Sigurður Karlsson hefur þýtt en eldri þýðingin er stytt og var ekki gerð úr finnsku. Tíu vísur er ný barnabók eftir Helgu Egilson, sem myndskreytir þekktar barnavísur, og meðal annarra bóka má nefna verk um list og feril Ásgerðar Búadóttur veflistakonu.
Kristján segir ekki vera kreppu í bókaútgáfu.
„Við merktum aukningu í bóksölu í sumar, bóklestur er að aukast og aðsókn að bókasöfnum hefur aukist. Þó að markaðurinn muni hugsanlega straumlínulagast eitthvað vegna ástandsins held ég að Íslendingar verði hliðhollir bókinni,“ segir hann.
