Drekasvæðið.

Opnað verður á ný fyrir umsóknir um olíuleit á Drekasvæðinu eftir áramótin en Katrín Júlíusdóttir iðnaðarráðherra segir að skattareglum í tengslum við olíuleitina verði ekki breytt að þessu sinni. Hún segir í samtali við Morgunblaðið að Norðmenn séu að hugsa sér til hreyfings á Drekasvæðinu sem auki tiltrú á því. Því sé hentugt fyrir Íslendinga að fara sér í engu óðslega en fylgjast vel með því hvað þeir geri og hvaða kjör þeir bjóði.

Um sé að ræða áhættusamt leitarsvæði, séð með augum olíufélaga en verðleggja beri auðlindir landsmanna hátt þótt við verðum auðvitað að vera samkeppnishæf. Fullyrt hefur verið að skattareglurnar á Drekasvæðinu séu óhagstæðar og hafi fælt áhugasama aðila frá því að bjóða í sérleyfin fimm sem í boði voru.

„Ég ætla ekki að segja að ég sé endilega sammála eða ósammála því,“ segir Katrín. „En við erum í miðri efnahagslægð, ekki bara hér á landi heldur annars staðar líka. Stórir aðilar í olíubransanum hafa ekki verið á mikilli hreyfingu inn á ný svæði og því finnst mér eðlilegt að við öndum með nefinu. Við opnum þetta aftur núna um áramótin og förum um leið með gagnrýnum hætti yfir okkar kerfi en ég sé ekki ástæðu til að stökkva til og gera breytingar núna.“